Aizawlah International Nurses Day hmang
Civil Hospital, Aizawla nurse-te chuan nimin khan Civil Hospital conference hall-ah International Nurses Day an hmang a, Blessino School of Nursing pawhin an hmang.
Civil Hospital-a nurse-te'n Nurses Day an hman chu Health & Family Welfare principal director Dr Vanlalsawma'n a hmanpui. Chawhma lamah Health Principal Director-in thu a sawi bakah, Cynthia Lalremliani'n Day thupui a sawi a, nurse thutiam an sawi rual bawk. Chawhnu lamah intihhlimna hun hman a ni.
Blessino School of Nursing chuan Nurses Day pual hian nimin zing dar 7-9 chhung khan Khatla kâwn leh Maubawk kâwnah free health check-up an buatsaih a, a thlàwnin mi 190 chuang-te blood pressure leh blood sugar an endiksak a, a duh tan condom leh pamphlet an sem bawk. Chhun lamah thisen an pek bakah, chawhnu lamah an auditorium-ah intihhlimna hun an hmang leh a ni.
International Nurses Day hi Florence Nightingale pian champha May 12-ah hman ṭhin a ni a, kumina thupui chu 'Our nurses, our future, the economic power of care' tih a ni. Nurses Day hi ram 138-in an zawm a, khawvelah nurse nuai 279 vel awm anga ngaih a ni.