CM hoin Mizoram hmasawnna tura NEDFi kaltlanga hmalak theihnate thlirho

Chief minister Lalduhoma hoin nimin khan CMO Conference Hall-ah sorkar mi pawimawhte leh North Eastern Development Finance Corporation Limited (NEDFi) hotute an ṭhukhawm a, Mizoram hmasawnna tura NEDFi kaltlanga hmalak theihnate an thlirho.

Ṭhutkhawmah hian Chief Minister adviser pahnih TBC Lalvenchhunga, MLA Dr KC Lalmalsawmzauva te, Planning, Finance leh department danga mi pawimawhte an tel a; NEDFi hotute'n an hnathawh dan leh scheme an neih, Mizoram tana hman ṭangkai theihte an tarlang.

NEDFi hotute chuan, Mizoram sorkarin kutkawih eizawnna tihhmasawnna lamah nasa taka hmalak a tumna chu an tuipui tih sawiin, Mizoram sorkar leh bank-te thawh dun theih tur ruahmanna an duang tih an sawi.

Kum 2017 aṭanga NEDFi-in an kalpui tawh Ministry of DoNER leh SIDBI thawhhona hnuaia North East Venture Fund an kalpui dan an sawifiah a; Mizoramah NE Venture Fund hmang ṭangkai mektu starts-up pali an awm mek dan te, NEDFi's Advisory & Consultancy Services chungchangte an sawifiah bawk.

NEDFi hian Mizoramah branch pathum - Aizawl, Lunglei leh Champhaiah an nei a, kutkawih eizawnna (entreprenuership) hmasawnna lamah hma an la deuh ber. Cheng vbc. 211.30 sênna project 1,295 kalpui mekin, cheng vbc. 183.83 an pe tawh. Artisan thilsiam chhuah zawrhsakna hmun Dawrpuiah an nei a ni.