India Skills National Competition-a tel tur Mizo ṭhalai 16-te vailiam
Labour, Employment, Skill Development and Entrepreneurship (LESDE) department hmalaknain New Delhi leh Karnataka-a May 14-16, 2024 chhunga India Skills National Competition neih tura tel tur mi 16-te chu nimin khan LESDE secretary Lalmalsawma Pachuau-in a vailiam.
Lalmalsawma Pachuau chuan, intihsiaknaa tel turte chu an kalna apiangah Mizoram aiawh an ni tih hre reng turin a chah a, "In chezia leh nungchang thlengin ram tan mawi takin awm ang che u. Intihsiakna hi India ram mai bakah, khawvel huap pawha Mizo hnam ziarâng, nihna leh themthiamna phochhuahna remchangah chantir ngei tum ang che u," a ti.
India Skills National Competition-ah hian state hrang hrang aṭangin mi 500 chuang an tling a, trade hrang hrang 63 hmangin an intihsiak dawn a ni. Intihsiakna paltlangte chuan September 2024-a Lyon, France-a neih tur WorldSkills 2024-ah India aiawhin an tel leh ang.
Mizo ṭhalai tel turte hi trade 16 - bakery (chhang ur), cooking (ei-in siam), floristry (pangpar khawi), hair dressing (sam siam), shoe making (pheikhawk siam), beauty therapy, drone film making, electronics, electrical installation, fashion technology, health & social care, IT software solution for business, pattisserie & confectionery, painting & decoration, plumbing & heating leh visual merchandising-ahte an tel dawn a ni.
Mizoram team hi LESDE department official parukin an hruai a; May 14-16, 2024 chhung intihsiakna neih tur niin, Delhi leh Karnataka state-te'n an inthlen ṭâwm a ni.