MNF MLA-te'n sum lapse hai chhuak lo se mipuiin an hre lo ang - Lalrinawma

MNF party-in nimina an pisaa inkhawm an buatsaihah MNF general secretary Lalrinawma chuan, Mizoram tana SASCI sum pek, sorkar laipuia kîr (lapse) leh chungchang chu MNF MLA-te'n hai chhuak lo se mipuiin an hre dawn lo niin a sawi.

Lalrinawma chuan, Special Assistance to States for Capital Investment (SASCI) sum vbc. 223 lapse chungchangah khan ZPM-in sum lapse a awm lo tiin thuchhuah an siam niin a sawi a, "Kan MLA-te'n hai chhuak hlauh lo se chuan mipuiin a lapse tih pawh kan hre lo ang. SASCI sum lapse avangin Mizoramin sum kan chan ngei ngei tur tam tak kan chàn phah a ni," a ti.

SASCI sum lapse vangin GST-ah ringawt cheng nuai 2,000 chuang Mizoram sum báwma lut tur a lut lo nia sawiin Lalrinawma chuan, "Labour cess-ah tam tak kan chán bawk. Hnathawktute inhlawhna tur nuai tam tak a luang ral bawk a, a uiawm tham tak zet a ni," a ti a; khua leh veng hrang hrangin hmasawnna an dawn tur khelmual, community hall leh thil dangte an neih loh phah dawn bawk niin a sawi.

MNF General Secretary chuan, MNF chu hi Mizorama political party insawh nghet ber leh ruhrel lian ber a nia sawiin, "Mipui thlavâng hauh turin theihtawp kan chhuah zel dawn. Sorkar kal dik lo véng tur te, ram mipui thlamuan turtein theihtawp kan chhuah zel dawn a ni," a ti.

MNF inkhawmah hian AMC corporator Chuauzikpuii pawhin thu sawiin, "Kan ramah hian eng nge thleng a, kan sorkar hian eng nge a tih, tihte hi mipuiin kan hre tur a ni," a ti a; politics ngaihven a changkang a, khua leh tui ṭha chuan ram inrêlbàwlna an ngaihtuah tur a ni tih a sawi.