Party ṭhenkhatte debate-a an incho kual hi a lungchhiatthlak - BJP President

BJP, Mizoram president Vanlalhmuaka chuan nimin khan an pisaa political session-ah thu sawiin, SASCI sum chungchanga party ṭhenkhatte debate-a an incho kual chu lungchhiatthlak a tih thu a sawi.

Vanlalhmuaka chuan, Mizoramah ram hruaitu lu berte insawifiah leh mipui hmaa an thusawi tawh sawi pial dan zawngin an buai hle ṭhin niin a sawi a, "Tuna SASCI sum chungchanga debate-a incho kual a, mipui rilru lâk pên tum politician-te hian Mizoram hi min thamlo hle a, mipui lam lah kan harh thei si lo, a lungchhiatthlak hle a ni," a ti.

Prime minister Narendra Modi chu mipui hmaa insawifiah tur emaw, a thusawi tawh sawi pial turin thuthar thehdarhtute hmaah a inlan ngai lo nia sawiin Vanlalhmuaka chuan, "A chhan chu Pu Modi-a hian manifesto angin India ram hmasawnna turin hna a thawh vang a ni," a ti a, a hnathawh rah chhuah chu thuthar thehdarhtute'n an puangzar mai ṭhin niin a sawi.

BJP President chuan, Mizoram chu ram hruaitute'n dâwt leh thu tak chawhpawlh hmangin an kalpui nia sawiin, "Kan ram hian hmasawnna kan hmu thei dawn lo a, ram hruaitu mi dik leh mi tak kan neih hunah kalphung dika kan kal hunah kan ramin hma a sawn mai dawn a ni. Mipa taka ram hruai ngam, mahni sorkar hun chhunga thil thlenga a mawh la ngam politician kan mamawh a, mipui hnena zirtirna dik pe ṭhin CM kan mamawh tak zet a ni," a ti.

Mizoram BJP President chuan, Mizoram chu Pathian thu tak nunpuina ram ni loin, Pathian thu sawina ram chauh a nih thu leh, Pathian thu duh tak ni si, nunpui leh si lohna a nih avangin hmasawnna tak tak a hmu thei lo niin a sawi bawk.