Ration buhfai khul/la ngai lote ration card tihtawp dawn lo

Food, Civil Supplies & Consumer Affairs (FCSCA) department chuan ration buhfai khul/la ngai lote ration card tihtawp (block) a nih dawn loh thu an tarlang.

FCSCA department chuan, tunlaiin khua leh veng ṭhenkhatah 'Ration buhfai khulh/la ngai lote pawhin e-pos machine hmeh vek tur a ni, hmeh loh chuan ration card an block dawn' tiin thu thehdarh nia hriat a nih thu an tarlang a, "Hei hi thu belhchian dâwl lo a ni. Ration buhfai la ngai lote'n e-pos machine an hmeh loh avangin ration card block tumna sorkarin a nei lo," a ti.

E-pos machine hmeh chu ration card neitute'n ration an la ngei tih finfiahna chauh a nih thu tarlangin FCSCA chuan, "Mipuite'n an ration an la (khul) lo a nih pawhin retailer-te'n an tiral/hralh mai tur a ni lo a, thla thara sem leh turin mipui tan an dah tur a ni. Sorkarin mipui tan pawisa tam tak sénga buhfai a lei hi e-pos machine kaltlang loa tihral/hralh hi dan bawhchhiatna a ni a, e-pos machine kaltlangin a dawngtu tur dik takte hnenah chauh sem tur a ni," an ti. Sorkar ṭawiawm tlat tur leh dan zâwm turin mipui leh retailer-te an sâwm nghal bawk.