Thlai thar lei tura hmalak kan châk tawh - Adviser to CM
ZPM party chuan nimin khan an pisaah chhung inkhawm an nei a, thu sawitu adviser to CM Dr KC Lalmalsawmzauva chuan, thlai thar lei tura hmalakna kalpui an châk tawh hle tih a sawi.
Dr KC Lalmalsawmzauva chuan, "Model Code of Conduct zo se, ZPM policy - thlai thar lei tura hmalakna kalpui thuai kan châk tawh tak zet. MCC a zawh hunah thlai thar lei tura kan ruahmante mumal zawka puangzarin policy aṭangin programme-ah kan lut dawn," a ti.
Thlai thar leitu tur an dawr mek nia sawiin Lalmalsawmzauva chuan, "Agreement mumal tak kan siampui ang. Politics rawng kai loa rual taka kan kal theih nan regulated market society-a kalpui kan tum avangin farming society din tur a ni a, Cooperation hnuaiah society tinin registration an tih a ngai. Mirethei lamṭang tur kan nih avangin anmahni khai chhuah hi kan tum ber a ni," a ti a; Agriculture department hnuaiah marketing board din a, Cabinet meeting hmasa berah chhawp chhuah an tum thu a sawi.
Adviser to CM chuan, sorkarin sawhthing, aieng, hmunphiah leh hmarcha leina tur rate a bithliah aia sanga lei tur an awm chuan sorkar a inrawlh kher dawn lo tih sawiin, "Rate bithliah kan siamte hi grade A a ni a, sawhthing leh thlai dangte aiin hmarcha hi market ṭha ber a ni," a ti.
Thlai thar lei turah kut hnathawktute an dik a ngaih thu sawiin Malsawmzauva chuan, "Hralh duh luat vang leh hlâwk tum luat vangin dik lo taka thlai tharte hralh duh an awm ṭhin a, mi depdê leh hlemhlête avangin mualpho theih a ni," a ti a; a man bithliahah an fimkhur thu leh thlai tharte dah khawmna atan warehouse paruk siam tum a nih thu a sawi.
Dr KC Lalmalsawmzauva chuan, bána kaih (hand holding) policy chungchanga hma la turin sorkar department 17-te an sawihopui tawh tih sawiin, "Agriculture & allied sector, Tourism leh Industry-ahte pilot project kalpui phawt tur a ni. Sem policy ang ngawta kalpui tur a nih loh avangin bank loan hmangin project base-a kalpui kan tum. Chief Minister Special Package pawh awm thei tura ruahman chhin a ni," a ti.