Lunglei HPC Vice Chairman-in Lallianzuala lawmpuina a hlân

Lunglei District High Powered Committee (HPC) vice chairman V Malsawmtluanga, MLA hoin a pisaah nimin khan footballer Lallianzuala Chhangte chawimawina hun hman a ni.

V Malsawmtluanga chuan, Lallianzuala Chhangte chu Mizote tihmingṭhatu a nih thu leh a ngaihsan thu sawiin, "Têttê aṭanga Pathian ṭih tlat mi a ni a, a thil tihnaah mi dangte aia hlawhtlin tuma bei tlat mi leh taima a ni," a ti.

Lunglei chhûl chhuak Mizo tihmingṭhatu an nei chu lawmawm a tih thu sawiin V Malsawmtluanga chuan, nikum ang bawkin kuminah pawh All India Football Federation Player of the Year a nih leh ngei theih nan duhsakna a hlân.

Lallianzuala Chhangte pawhin thu sawiin V Malsawmtluanga chu naupan lai aṭanga football tuipuitu leh amah fuih ṭhintu a nih thu a sawi a, "Lehkha zir ngawr ngawr ni lo a, duh thlanna dang siam thei tura min fuihtu a ni a, tun dinhmun ka thlen theih nana ka tan mi pawimawh tak a ni," a ti.

HPC Vice Chairman hian Lallianzuala Chhangte hnenah lawmpuina thuchei a hlan a ni.