KHAWTHLIR

Thisen pe

Blessino Nursing School chuan International Nurses Day pualin nimin khan Civil Hospital, Aizawl tan thisen unit 45 an pe a, petute hmeichhia 38 leh mipa pasarih an ni.

YMA Day pualin tanpuina pe dawn

Central YMA chuan kumin YMA Day pualin ṭanpuina Rs 3,30,000 sem chhuah an tum. Ṭanpuina pawisa an pek turte chu Mizoram páwn khaw hrang hranga Mizo welfare 16-te leh Aizawla damdawi-in parukte hnenah Rs 15,000 ṭheuh a ni a; TNT Zuangtui, Ṭawngṭai Bethel Camping Centre leh OKM Home-ah buhfai ṭhahnem tak pek an tum bawk.

HSLC result

Mizoram Board of School Education (MBSE) chuan High School Leaving Certificate Examination 2024 result chu vawiin chhun dar 12 hian a tichhuak dawn. Result hi MBSE pisa, Chaltlang leh website pahnih - www.mbse.edu.in leh www.mbseonline.com ahte en theih a ni dawn a, a duh tan result bu lei theih a ni bawk ang.

Tuialhthei dan loa zawrh khap a ni

Aizawl district magistrate Nazuk Kumar chuan thupek chhuahin, Aizawl district-ah dan lo (black)-a petrol leh diesel zawrh khap a nih thu a puang a; thupek zâwm lote chu IPC Section 188 hmanga hrem theih an ni tih a tarlang. District Magistrate chuan, Aizawl district-ah dan loa petrol leh diesel zuar an awm ṭhin thu leh dan kalh a nih thu a tarlang a, "Mi tu mahin Aizawl district-ah petrol leh diesel hi phalna nei loin an zuar tur a ni lo," a ti.

Khawlai thian fai

Kolasib-a UDPA department office, Joint VC leh Sub-Hqrs. YMA ṭangho buatsaih, Project Waste Free Kolasib, 2024 thawh hnihna atan nimin khan Kolasib khawpuia veng hrang hrangah bawlhhlawh thenfai hnatlang huaihawt a ni a, hnatlanga chhuakte chu Parkkâwn aṭangin district bawrhsap John LT Sanga'n a vailiam. Bawrhsap chuan, khawtlang fai leh hrisel siam tur chuan thawhhona ṭha neih a pawimawh thu a sawi