Community CCC kaihhruaina tichhuak CCCC senso sorkarin a tum dawn lo

Health & Family Welfare depart­ment chuan October 7, Nilaini khan vantlang/kohhran hmuna community covid care centre (CCCC) kaihhruaina - Standard Operating Procedure (SOP) a tichhuak. CCCC-a sensote chu sorkarin a tumsak dawn lo a, khum 50 aia tlemah medical team a pe dawn lo bawk.

HFW department-in CCCC atana kaihhruaina a tihchhuaha a lan danin, CCCC-a awmte chaw ei tur leh mamawh dangte chu a awmna veng (a dintu)-in emaw, CCCC-a awm emawte'n an tum a ngai a; an chhungte'n an duh chuan an pe thei. Community CCC SOP hi tihchhuah a nih aṭanga hman nghal tur a ni.

CCCC SOP chuan, khum 50 leh a aia tam nei chu HFW department-in medical team a ngaihtuahsak dawn tih tarlangin, "Khum 50 nei tling lo erawh chuan medical team leh security an intum tur a ni. Duty turte awmna hmuna hranpaa neih tur a ni a, PPE inthlakna tur a hranpa a awm tur a ni bawk," a ti.

Health department tarlan danin, CCC chu damdawi-in emaw, health care facility emaw ni lo - sikul hostel, community hall, etc, Covid-19 vei enkawlna tura siam rem a ni a, Covid-19 vei natna lang chhuak lo (asymptomatic) leh na em em lo (very mild/mild)-te dah tur a ni. 

HFW department chuan, Covid-19 vei hmuh belh zel a nih thu tarlangin, "A vei tawhte hi a tam zawk chu natna lang chhuak lo leh na em em lo an ni tlangpui. Hei vang hian CCC-a dah tur an pung zel a, CCC siam belh zel a ngai ta a ni," a ti a; community CCC chu sorkar phalnaa sorkar puihna tel mang loa khawtlangin Covid-19 veite enkawlna hmun a din leh a kalpui a nih thu a tarlang.

CCCC-a awmte zawm tur eng emaw zat tarlan a ni a, chu'ng zingah chuan, mutbu mahnia intum a ngaih thu a tel. A enkawltute zawm tur te, Covid-19 vei bula awm dan tur te, bawlhhlawh sawngbawl dan turte eng emaw zat tarlan a ni bawk.

1.    Mimal, a hran ṭheuha awm theihna tur pindan (single room), ek-in/bual-in a hran emaw, inṭâwm theih emaw a awm tur a ni.

2.    Single room a awm thei lo a nih a, room khata mi 2 aia tam an awm dawn chuan, khum inkar hlat zawng metre 1-2 tal a ni tur a ni.

3.    Room thengthaw nuam tak, ṭha taka thli a luh leh chhuah theihna hmun a ni tur a ni.

4.    Mi dangin awlsam tak leh ṭul loa an tlawhpawh theih lohna turin hungna ṭha tak a awm tur a ni.

5.    Tui, electric power, bawlhhlawh sâwngbawl hna leh ṭul dangte hi a dintute emaw, a awmna venga LTF/VTF-in an ngaihtuah ang.

6.    Chaw leh mamawh dangte chu CCCC-a awm, mahniin emaw, a dintuin emaw an tum tur a ni a, enkawltute hriatpuinain damlo chhungte'n an pe thei ang.

7.    Khum 50 leh a aia tam nei chu HFW department-in medical team a ngaihtuahsak ang a, khum 50 nei tling lo erawh chuan medical team leh security an intum tur a ni. Duty turte awmna hmun hranpa neih tur a ni a, PPE inthlakna tur a hranpa a awm tur a ni bawk.

8.    CCCC din a nih hmain CCC State Management Team /CMO emaw, an aiawha ruat emawte'n LTF/VTF-te puihnain an endik tur a ni.

9.    CCCC-a awm theite:

    i) Covid-19 vei, natna lang chhuak lo

    ii) Covid-19 vei, na em em lo

    iii) Damlo taksa chak lo bik - HIV, cancer enkawl lai, kal/thin leh taksa péng dangte thlak tawhte leh nau pâi laite CCCC-ah enkawl phal a ni lo.

    iv) Kum 60 chung lam leh natna benvawn - BP sang, zunthlum, lung natna, chuap/thin leh kal natna nei, thluak lam natna leh a dang neite chu doctor-in phalsakte chauh CCCC-ah an awm thei.

10.    CCCC-a thawktu awm turte:

    i) Medical team pakhat zel. Medical team-ah hian doctor (MBBS/BDS/Ayush doctor) pakhat, para-medical (nurse/health worker) pakhat leh, helper (volunteer) pahnih an tel.

    ii) Security team: Veng chhung mi ngei LTF/VTF-in an ruat ang.

    iii) LTF/VTF member aṭangin CCCC-a mawhphur tur leh biakpawh theih tur mi pakhat ruat tur.

    iv) CCCC-a thawktu zawng zawng training neihpui an ni ang.

    v) Medical leh security hi team hnih ve ve tal awm thei se. Digital thermometer leh pulse oximeter chu CCCC dintute intum tur a ni.