Sorkar sikulah fail an tam leh ber hi sorkar leh zirtirtute tan chona a ni - Education Minister

School Education minister Dr Vanlalthlana chuan High School Leaving Certificate (HSLC) Examination 2024-ah sorkar sikulah fail an tam leh ber chu ngaihtuahna sèn a ngaihzia tilangtu a nih thu leh, sorkar leh zirtirtute tan chona lian tak a nih thu a sawi.

Education Minister hian nimin khan a pisaah thuthar thehdarhtute a kàwm a; Mizoram Board of School Education (MBSE)-in HSLC 2024 result a tihchhuaha pass-te a lawmpui thu a sawi rualin, pass zo ve lote chu beidawng loa exam leh turin a chah.

Dr Vanlalthlana chuan, "Sorkar sikula fail an tam leh ber hi ngaihtuahna sèn a ngaihzia tilangtu a ni. Sorkar bakah zirtirtute tan chona lian tak a ni a, theihtawp kan rawn chhuah ang," a ti.

Education Minister chuan thuthar thehdarhtute zawhna chhángin, sorkar sikula zirtirtu indaih lohna phuhrûkna atan casual teacher 1,415 lak thuai a nih dawn thu leh muster roll-a rawih zirtirtute pawh an rawih chhunzawm leh tawh thu a sawi.

Dr Vanlalthlana chuan, zirtirtu lak belhna tura advertisement an chhuah tawh chu Model Code of Conduct (MCC) vangin an la kalpui theih rih lo tih a sawi a, "Zirtirtu lakna turah hian ruahmanna kan siam chho viau a, inthlanin min tihbuai tâk avangin ECI-ahte kan dil a, rem an tih chuan kan kaltlangpui dawn a, mahse, chhànna min la pe lo," a ti.

Dan ang takin zirtirtu an lâk dawn thu leh dan ang chuan primary school-ah post ruak zat lêt diltu an awm chuan written exam neih tur a nih thu sawiin Minister chuan, "Primary school zirtirtu post ruak zat lêt diltu an awm loh avangin interview ringawtin kan kalpui dawn," a ti a; middle school leh high school-ah chuan written exam leh interview a awm dawn thu a sawi.

Dr Vanlalthlana chuan, zirtirtu lâkna interview-ah tun hmaa la tih ngai loh, practical teaching telh a ni dawn tih sawiin, "Hei hi an thiamnain a phâk vang ringawt ni loin, naupang zirtir dan an thiam ngei em tih hriatna tur atana ruahman a ni a, exam pawh MCQ veka kalpui a ni dawn," a ti.

Tarlan tawh angin, March 15, 2024 khan Mizoram sorkar chuan zirtirtu (casual teacher) lakna tur advertisement a tichhuak a; high school atan mi 350, middle school atan mi 371 leh primary school atan mi 694 lak tum niin, an vaiin mi 1,415 lak tur a ni. Advertisement chhuah tûk, March 16, 2024-ah Lok Sabha inthlan hun puan a ni a, Model Code of Conduct puan nghal a nih avangin hmalak zui theih a ni rih lo.

School Education Minister chuan, ZPM sorkar hnua a vawi khat nan HSLC exam result tihchhuah a ni chu lawmawm a tih thu sawiin, "Pass thar zawng zawng ka lawmpui a, duhsakna sang ber ka hlan. Hlawhtlinna chang ve ta lote pawh beidawng loa exam nawn leh turin ka chah a ni," a ti a; result tihchhuahna atana thâ thawhtu zawng zawng chungah a lawm thu a sawi.

School Education Minister chuan, zirlai pass tharte chu an thiamnate ram leh hnam tana hmang turin a chah a, "Pathian bakah in chhung te, khawtlanga nangmahni duhsaktute leh in zirtirtute lakah lawmthu sawi nachâng hria ang che u," a ti bawk.