HSLC 2024-ah zirlai 13,618 an pass; Nikum aiin pass percentage a sang zawk

Mizoram Board of School Education (MBSE) chuan nimin chhun dar 12 khan High School Leaving Certificate (HSLC) Examination 2024 result a tichhuak a, zirlai exam 18,561 zinga 13,618 an pass a, pass percentage 73.37% niin, nikum aiin 2.23%-in a sang zawk.

HSLC 2024-ah hian pakhatna chu Lalmoipuia Lawmzual s/o HL Lawmzuala, St. Paul's Higher Secondary School a ni a; top 10-ah mi 14 langin, mipa paruk leh hmeichhia pariat an ni a, hnam dang pakhat a tel. Nikum khan top 10-ah mipa pathum leh hmeichhia 14 an lang.

Exam hmachhawntu zirlai 18,561 zinga 18,213 chu regular student niin, private-a exam mi 348 an awm a; regular student zingah 13,477 (73.99%) an pass a, private candidate zinga 141 (40.52%) an pass. Zirlai 4,837 an fail a, nikumah 5,162 an fail a, kum 2022-ah 4,928 leh 2021-ah 2,856 an fail a ni.

Zirlai exam zingah mipa aiin hmeichhia 1,253-in an tam a, pass zingah pawh mipa aiin hmeichhia 744-in an tam zawk. Mipa pass percentage 74.38 a ni a, hmeichhia pass percentage 72.48 a ni thung.

Distinction-ah zirlai 1,332 an pass a, first division-ah zirlai 3,801 pass in, nikumah 3,488 an ni a; second division-ah 5,564 pass in, nikumah 4,731 an pass. Third division-ah zirlai 2,921 an pass a, nikumah 3,357 an pass. Compartmental chance nei zirlai 59 an awm a, nikumah mi 62 an awm.

Zirlai exam zawng zawng pass vekna sikul 85 a awm a, fail vekna sikul 18 a awm. Candidate zawng zawng pass vekna sikul hi nikumah 107 a awm a, kum 2023-ah 98, 2021-ah 175, 2020-ah 65, 2019-ah 72 leh 2018-ah 105 an awm. Pass awm miah lohna sikul nikumah 14 a awm a, kum 2022-ah sikul 15, 2021-ah pasarih, 2020-ah 16, 2019-ah 24 leh kum 2018-ah 15 a awm.

Tun hnaia HSLC Exam-ination-a pass percentage zat chu - kuminah 73.37%, nikumah 71.14%, kum 2022-ah 70.64%, 2021-ah 82.43%, 2020-ah 68.33%, 2019-ah 67.93%, 2018-ah 76.65%, 2017-ah 72.17%, 2016-ah 71.17%, 2015-ah 68.30%, 2014-ah 67.51%, 2013-ah 58.63% leh kum 2012-ah 72.27% a ni.