Zirlai pawlte'n zirlai pass-te an lawmpui

Mizorama zirlai pawl pathumte chuan thuchhuah siamin, Mizoram Board of School Education (MBSE)-in HSLC 2024 result felfai taka nimina an tihchhuah avanga an lawm thu leh zirlai hlawhtlingte an lawmpui thu an tarlang.

Mizo Zirlai Pawl chuan, "Zirlai hlawhtlingte thinlung takin a lawmpui a, la hlawhtling ve rih lote leh comparmental chance la nei zawng zawngte pawh beidawng lo a, rilru thar nen hma lam pan turin duhsakna kan hlan," an ti.

HSLC 2024-a ti ṭha zual, top 10-ah Mizo zirlai 13 an lang chu lawmawm a tih thu sawiin MZP chuan, "Tun hma result nena khaikhinin, hmasawnna lian takah kan ngai," an ti a; HSLC result felfai tak tihchhuah a nih avangin MBSE-a thawkte thawhrimna leh inpeknaah an lawm thu an tarlang bawk.

Mizo Students’ Union pawhin MBSE-in HSLC 2024 result a tichhuak chu lawmawm an tih thu tarlangin, "Pass percentage 73.9 lai a ni thei leh kum 2023 aia pass percentage a sang hi lawmawm kan ti tak zet," an ti a; zirlai pass-te lawmpuiin duhsakna an hlan a, pass lote chu beidawng loa ṭan la thar turin an chah.

MSU chuan, sikul 18-ah zirlaite an fail vek chhan lian ber chu zirtirtu indaih lohna a nih rualin, sikul ṭhenkhatah chuan zirtirtu inthlahdah vang a nih thu an tarlang a, "Zirtirtu indaih lohna vanga zirlai fail kan neihna sikul leh zirtirtu inthlahdahte chhui chhuak a, dan anga hma la turin Mizoram sorkar kan phût," an ti.

Students' Self-Support Union (SSU) chuan, HSLC 2024 result chhuak avangin an lawm thu sawiin, "Zirlai pass zawng zawngte kan lawmpui rualin, hlawhtlinna chang ve lote kan tawrhpui tak zet," an ti a; HSLC result ṭha tak neih a nih theih nana beitu zirtirtute an chhuan thu an tarlang.

SSU chuan, HSLC 2023-ah distinction-a pass 10.11% an nih laiin, kuminah 7.01.% an ni tih sawiin, "Ṭan kan ngaihna tur a lang chiang hle. Chutihrualin, nikum 2023-a pass percentage 71.14 chu 2.21-a khûmin, 73.37% a ni hi lawmawm kan ti a, zirlai, zirtirtu leh nu leh pate theitawp chhuaha ṭang turin kan chah a ni," an ti.