
African Swine Fever avangin niminah vawk 17 thi, 16 suat
African Swine Fever (ASF) vangin nimin khan vawk 17 a thi a, vawk 16 suat a ni bawk. Kumin 2024-ah nimin thlengin ASF vangin vawk 701 a thi tawh a, vawk 403 suat a ni tawh.
Animal Husbandry & Veterinary department chhinchhiah danin, ASF vanga nimina vawk thi 17-te chu Tuirialah pariat, Dulte-ah pali, Kulikawnah pathum leh Thingsul Tlangnuamah pakhatte a ni. ASF darh zel tur vênna atana nimina vawk suatte chu - Chhingchhipah pariat, Khumtungah pasarih leh Tualte-ah pakhat a ni.
AH&Vety department chuan, vawk damlo sa rêng rêng mihring ei atan a him lo tih an tarlang a, "Vawk damlo talh leh hralh khap tlat a ni a, ti luite hrem theih an ni. Vawk thite khâmah emaw, luiah emaw paih mai loh tur a ni a, thûk takah chinai nen phûm ṭhin tur," an ti a; vawk thite mahnia lo zai hawng lo turin mipui an chah.
ASF CHUNGCHANGA AH&VETY THUCHAH
☑ Vawk damlo/thi a awmin AH&Vety-ah hriattir vat tur.
☑ Vawk damlo dah hran vat tur a ni a, a enkawltute'n thawmhnaw hâk bik neih a ṭha.
☑ Vawk damlo talh leh hralh chhuah khap tlat a ni a, ti luite hrem theih an ni.
☑ Vawk thi paih mai loh tur, thûk takah chinai nena phûm ṭhin tur.
☑ Vawk damlo sa rêng rêng mihring ei atan a him lo.
☑ Vawk thite mahnia zai hawn ngawt loh tur.
☑ Ran damlo emaw, a sa emaw hri lênna hmun aṭanga lak chhuah loh tur.
☑ Hri lênna tlawhpawh loh tur.
☑ Chaw ningnawi chhum so that loh chu vawk pek loh tur.
☑ Ran in leh a vel sahbawn tui nen tihfai fo tur.
☑ Sanghal thi tlaw a awmin AH&Vety-ah hriattir vat tur.
☑ Disinfectan atan sahbawn (surf etc.), bleaching, chinai, phenol-te a hman theih.
☑ Ran damlo chungchangah 1962 toll free-ah doctor biakràwn theih a ni.