LADC-ah Cong. & MNF-in sorkar an siam; CEM atan C Lalmuanthanga lak luh a ni

Lai Autonomous District Council (LADC)-ah hun eng emaw chen sorkarna siam thei an awm loh hnuah MNF MDC leh Congress MDC ṭangrual chuan sorkarna an siam a; nimin khan chief executive member (CEM) atan South Lungpher bial aṭanga Congress ticket-a thlan tlin C Lalmuanthanga lak luh a ni.

LADC-ah hian hun eng emaw chen sorkarna siam thei an awm loh hnuah MNF MDC 12 leh Congress MDC pakhat chuan United Legislature Party (ULP) an din a, Governor hnenah sorkar an siam theih thu an thlen. Governor chuan pawmpuiin, sorkarna an siam ta a ni.

Governor remtihna angin ULP-te'n leader atana an thlan C Lalmuanthanga chu Lawngtlai bawrhsap Cheemala Siva Gopal Reddy-a'n LADC conference hall-ah rinawmna thu tiamtirin CEM atan a la lut.

CEM thar C Lalmuanthanga chuan, Pathian leh ULP-a a thawh­puite chungah a lawm thu sawiin, "Demo­cratic principle ngai pawimawha ram dan­pui chhunga dik leh fel taka thil kalpuia a hun taka sorkar thar pawm­puina min petu Governor chungah lawmthu ka sawi. Mahni party nih loh vanga thin­hrikna nei hauh loa rilru zau leh pa chan chang taka LADC sorkar thar siamna kawnga dodalna leh harsatna engmah min siam sak lotu chief minister Pu Lalduhoma chungah pawh lawmthu ka sawi," a ti.

A kaihhruai sorkar chu Lai ram mipui huap zo leh langtlang sorkar ni tura kalpui an tum thu sawiin C Lalmuan­thanga chuan, "Central sorkar leh state sorkar aṭanga kan sum dawn ang angte dik leh langtlang taka hman kan tum ang," a ti a, sum thawk chhuak turin theih­tawp an chhuah dawn thu a sawi.

LADC CEM hian executive body a pian hmaa a thawhpui tur deputy CEM atan Lungtian bial aṭanga thlan tlin Sanghuliana Mualchin a ruat a ni.