Duhoma'n insawifiahna a thehlut

ZPM Legislature Party leader Lalduhoma chuan, MLA aṭanga bàn tura hêk a nih chungchangah Assembly Speaker-in insawifiah tura a hriattir angin nimin khan insawifiahna a thehlut.

Lalduhoma hian a insawifiahna lehkha chu a PA a thehluhtir a; Speaker a awm loh avangin Assembly Secretary chuan a lo dawng a ni.

Lalduhoma hian Indian Constitution 10th Schedule Para 2(2) bawhchhiaa ngaiin MLA aṭanga bàn turin MNF MLA 10-te chuan September 22, 2020 khan Speaker hnenah ngenna (hêkna) an thehlut a; MNF MLA dang pahnihin September 24 khan Lalduhoma bàn tura ngenna Speaker hnenah an thehlut ve leh bawk.

September 24 vek khan Legislative Assembly chuan Lalduhoma chu insawifiah turin a hriattir a, ni 14 hun pein, hun an pek chu nimin khan a tàwp a ni.