MBSE-in HSLC 2024 result complaint hun ni 7 hawng

Mizoram Board of School Education (MBSE) chairman JH Zoremthanga chuan nimina HSLC 2024 result an tihchhuah chungchangah thuthar thehdarhtute a kâwm a; HSLC result-ah complaint duh nei tan ni sarih chhung hun hawn a nih thu a sawi.

JH Zoremthanga chuan, HSLC 2024 exam tluang taka an zo thei leh ruahman lâwk anga result an chhuah theihna tura thawktu zawng zawng chungah lawmthu a sawi a, "Kuminah hian compartment 106 an awm a, heng naupangte hian admission an tlai lohna turin compartment exam buatsaih thuai kan tum a, HSLC result complaint hun ni sarih kan hawng bawk," a ti.

Nikum aiin kuminah pass percentage a sang zawk tih sawiin JH Zoremthanga chuan, "Zawhnate hi lower order thinking skills (LOTS) aṭangin 60% siam a ni a, a bak 40% hi application leh higher order thinking skills (HOTS) aṭanga siam a ni. Zirnain hma a sawn zel theih nan HOTS question telh tam deuh deuh tura ruahman a ni," a ti. Kuminah exam laia hnawhchhuah ngaia thil dik lo ti an awm loh thu sawiin, lawmawm a tih thu a sawi bawk.