Mipui tihbeidawn loh hi kan tum ber - Prof. Lalnilawma

Horticulture minister Prof. Lalnilawma chuan nimin khan Chite Venga Horticulture hmun a tlawh a, Multipurpose Packing House, Mushroom Laboratory leh Scion Bank Greenhouse-te a en. Minister chuan, mipui tihbeidawn loh chu ZPM sorkar tum ber a nih thu a sawi.

Prof. Lalnilawma chuan, kuminah sawhthing thar a tam dawn tih sawiin, "Kut hnathawktute'n sorkar tharah beiseina an nei sang hle tih kan hriatin kan lawm hle a, mipui tihbeidawn loh hi kan tum ber a ni. Kut hnathawktute pawh thlai hrisel ṭha tak thar chhuak ngei turin ka duhsak a, rinawm taka kan thawh chhuah ngei kan ei hi Pathian duh dan a ni," a ti.

Thlai thar lei turin an inbuatsaih mek zel tih sawiin Minister chuan, "Tunlaiah social media-ah inbeihna a nasa tawh em em a, thu dik hre hmasa loa mahni hriat ang angte awih mai lo turin kan inchah a ni," a ti a; kut hnathawktute chu hlauthawng lo turin a chah.

Prof. Lalnilawma chuan, ZPM policy - handholding policy a hlawhtlin theih nan hma chak takin hma an lak thu sawiin, "Kuminah thlai thar lei nghal a ngaih dawn avangin a sâwngbâwlna turte leh a chhêk khawlna tur kudamte ngaihtuah a ngai a, thil hmanhmawhthlak a nih avangin kudam awm ang angte hman a ngai dawn," a ti.

Kudam awm ang ang hmang turin tuna hmanraw awm hman tlak leh ṭha tawh lote an thliar mek a nih thu sawiin Lalnilawma chuan, "Thawm ṭhat ngai awmte pawh thawm ṭha tura hmalak mek a ni. Department dang nena ṭan rual a ngaih avangin tu mah an rálbáng thei lo," a ti a; thawktute chu kut hnathawktute dinchhuah theih ngeina tura hnathawk turin a sáwm.

Minister hi bialtu MLA B Lalchhanzova, minister of state leh adviser to CM Dr KC Lalmalsawmzauva bakah, Horticulture leh Tourism department hotute'n an ṭawiawm a ni.