April-June 2020 chhunga Mizorama Bank 26-te CD ratio - 37.09%

Mizoram State Level Bankers Committee (SLBC) chu nimin khan Secretariat Conference Hall-ah an ṭhu a, SLBC chairman Lalnunmawia Chuaungo, chief secretary-in a kaihruai. Mizorama bank-te credit deposit ration (CD ratio) chu 37.09% a nih thu tarlan a ni.

Ṭhutkhawmah hian financial year 2020-21 kal mekah, April-June 2020 quarter chhunga Mizorama bank awmte hnathawh thlirho a ni a; kum 2020-21 chhunga sorkar scheme hrang hrang target duan chu an pawmpui nghal.

Meeting-a tarlan danin, Mizoramah bank chi hrang 26 awmin, chu'ngte chuan branch 210 an nei a; public sector bank-te'n branch 81, private sector bank-te'n branch 24, regional rural bank-te'n branch 86 leh cooperative bank-te'n branch 19 an nei a ni.

Mizorama bank 26-te'n April-June 2020 chhunga an dawn (deposit) zawng zawng chu cheng vbc. 13,469.91 a ni a, loan an pek chhuah (advances) zawng zawng chu vbc. 4,996.15 a ni. An pek chhuah zat hi an dawn zat aṭangin 37.09% a ni a, chu chu CD ratio chu a ni.

SLBC Chairman chuan, Mizorama bank-te CD ratio chu state dangte aiin a la hniam hle tih sawiin, "A chhan chu bank-te'n loan an pek chhuah tlem vang a ni," a ti a; Mizorama bank awmte chu a lawm rualin, Mizorama chengte hnena loan pek chungchangah an lakah beiseina sang tak a neih thu a sawi.

Lalnunmawia Chuaungo chuan, bank ṭhenkhat, a bik takin private bank-te chu sorkar leh mipui aṭanga deposit (sum dah luh) dawng tur ringawt an ni lo tih sawiin, "State hmasawnna turin mipui hnena loan pek chhuah lamah nasa lehzuala hma in lâk a, mipui tan in thawh tam leh zual a ṭul," a ti a; bank-te chu deposit ringawt ûm lo a, mipui hnena loan a tam thei ang ber pe chhuak turin a chah.

Ṭhutkhawmah hian financial year 2020-21 atan NULM hnuaia self employment programme loan pek tur target hrang hrangte leh PMEGP agency hrang hrang hnuaia district tinte target chu pawm a ni.

Mizorama bank dinhmun (April-June, 2020)

•    Bank chi hrang 26 a awm.

•    Bank 26-te'n branch 210 an nei.

        i) Public sector bank branch - 81

        ii) Private sector bank branch - 24

        iii) Regional rural bank branch - 86

        iv) Cooperative bank branch - 19

•    Bank 26-a dawn ( deposit) zat - vbc. 13,469.91

•    Bank-te pek chhuah (advances) - vbc. 4,996.15

•    CD ratio - 37.09%

•    Priority sector advances - vbc. 271.40

•    Agriculture atana pek chhuah - vbc. 19.51

•    MSME (industry & business) atana pek - vbc. 185.73