Agriculture Minister-in Zorin chìnna tlawh

Agriculture minister C Lalrinsanga chuan January 17, Zirtawpni khan Champhaia Agriculture Research and Seed Production Programme hnuaia French bean 'Zorin' chìnna hmun a tlawh.

Minister chuan, French bean chu a chi ṭha tur mithiamte'n uluk taka an enkawl a nih thu sawiin, "Seed production programme hnuaiah thlai chi dang pawh a chi ṭha tihchhuah tum a ni. Kut hnathawktute hnena thlai chi ṭha lo supply ṭhin chu tihtawp zel a ni dawn a, thlai chi ṭha chìn a nih theih nan mithiamte leh ṭhalaite kutah mawhphurhna tam zawk pek a ni ang," a ti.

C Lalrinsanga chuan, Mizoram sorkar hnuaia Agriculture department-in a tum lian ber chu - buh leh thlaia intodelh a nih thu a sawi a; French been hming 'Zorin' tih chu chief minister Zoramthanga leh amah (C Lalrinsanga) hming la kawpa phuah a nih thu a sawi bawk.

French been Zorin hi Champhai Agriculture Research and Seed Production Farm-ah November 9, 2019 khan ram hectare chanvea zauah chìn ṭan a ni a, a chi quintal 20 thar chhuak tura beisei a ni. Agriculture Minister hian Irrigation and Water Resource department hmalaknaa sak Lungdawh zau leilet châwmna tur tuikhuah, a vâng metre 40 leh a dung metre 50-a zaua sak a tlawh nghal. Tuikhuah hi Chemlui leh Thingdawl lui aṭanga tui lak dah khâwlna tur a ni a, leileta sem chhuahna tur tui kawng pawh siam zawh tawh a ni. Tuikhuah hian Lungdawh zaua leilet hectare 70-a zau chu kumtluanin a châwm thei tura ngaih a ni a, hna thawh tur 98% zawh a ni tawh.