CM office-in mi hniam zawkte FIR-in an rikrap - Congress

Congress party chuan, tun hnaiah thil ho tê têah Mizoram hruaitu lu ber Chief Minister Office (CMO) aṭanga mi hniam zawk leh thil ti thei ve lote vau leh rîkrâp ang zawnga lalna leh thuneihna kalpui a ni leh FIR thehluh a awm ta fo mai chu ṭha lo an tih thu an puang.

Mizoram Pradesh Cong­ress Committee (MPCC) chuan thuchhuah siamin, CMO-in thil lian tham ni lo leh holam tê têa FIR an thehlut ṭhin chu ṭul loa police tihbuaina leh mipui dikna palzûtnaah an ngaih thu an tarlang a ni.

MPCC chuan, Supreme Court pawhin sorkar sawiseltute laka sorkar inluling ṭhin chu a ngaimawh a, October 5, 2020 khan thuchhuah a siam tih tarlangin,  Sorkar sawiselna zawng zawng hi sorkar pawi sawina (sedition) leh intihhmingchhiatna (defamation)-a puh zel tur a ni lo, Mi tuin emaw sorkar sawiselna a siam emawin sedition or defamation law hmanga vau ve tur a ni lo a ti a ni, an ti.

India danpuiin khua leh tuite chu thusawi kawnga zalenna (Freedom of Speech) zau tak a pek angin mi tinin an duh zawng sawi chhuah theihna zalenna an nei tih sawiin MPCC chuan,  Sorkar kalphung leh ram hruaitute sawisel theihna zalenna zau tak kan nei a ni, an ti a; chuvang chuan, anmahni sawiseltu, mi chak lo zawkte laka thubuai thehlut a, police chakna hmanga hmeh mih an tum ṭhin chu an hrethiam thei lo tih an sawi.

MPCC chuan, Mizo­ram chief minister Zoram­thanga'n a duh duh a sawi nia tarlangin, "A risk kual a, an sorkar hmasaka lâr tak Peace Bonus pawh a phuahchawp mai mai a nih thu House zahawm takah meuh a sawi chhuak. Hetiang taka mipui zah lotu lakah hian thubuai siam tur ni se vawi eng emaw zat tâlbuai tawh tur a ni," an ti.

Congress party chuan, MNF sorkar hotute'n thil ho mai maia ngaih theih thila mipui an khin lêtna leh rîkrâp ṭhin ang chi chu communist ramah leh dictator lalna ramah lo chuan a awm khát hle tih sawiin, "Anmahni vote tlingtu Mizoram mipui an zah miah lo a, mipui zalenna thlenga rahbeh an pawiti miah lo tihna a ni," an ti a; MNF kaihhruai sorkar chu FIR thehlut fo lo a, an manifesto tihhlawhtlin tum turin an chah a ni.