Supplier thlan danah dik lo a awm lo - Supply Minister

Supply minister John Rotluangliana chuan, buhfai supply tur thlan danah thil dik lo a awm lo tih sawiin, "Zoram mipuite'n buhfai ṭha hnianghnar zawka an dawn theih hi kan duh ber a ni," a ti. John Rotluangliana hian nimin khan I&PR conference hall-ah thuthar thehdarhtute kawmin, supplier an thlan dan a sawifiah.

John Rotluangliana chuan May 15, 2014 ah supplier tur zawnna atan tender chhuah a ni tih sawiin, "Hetih hunlai hian thla tina buhfai kan mamawh zat chu quintal 1,30,000 vel a ni. FCI aṭangin normal allocation thla tin qtl. 52,210 a ni a, kan indaih lohna qtl. 80,000 hi FCI aṭangin a man to (economic cost) in kg. khat Rs. 29.81 in kan lei ṭhin. Tunah phei chuan economic cost hi kg. khat Rs. 31.34 a ni tawh," a ti.

Supply Minister sawi danin, Supply department chuan FCI aṭangin buhfai duh ang hmuh a harsat avang leh a man to avangin local supplier hnen aṭanga buhfai lei a hlawk zawk a beisei avangin thlan tin buhfai qtl. 30,000 supply tur thlanna atan tender chhuah a ni.

Chief Secretary kaihhruai State Project Approval Board (SPAB) chuan hei hi November 19, 2014 khan ngaihtuahin buhfai indaih lohna a nasat avangin qtls. 80,000 thla tin lei a phalsak.

SPAB hian thla tin buhfai qtl. 80,000 lei phalsak mah se, VIP quota leh special permit tihtawp a nih tak avangin buhfai hi thla tin qts. 80,000 aia tlem lei ṭhin a ni.

Local supplier hnen aṭang hian buhfai kg. khat Rs. 25.75 in lei a ni a, FCI aṭanga economic cost-a lei aiin qtl. khatah Rs. 406 zelin a tlawm a, tun dinhmunah local supplier hnen aṭanga buhfai lei a nih avangin cheng vbc. 55.48 vel sorkarin a hlep tawh.

FCI hnen aṭanga buhfai lei a nih chuan a man pek lawk a ngaih bakah, lak theih hun chhung a awm ṭhin a, local supplier hnen aṭanga lei chuan pawisa pek lawk a ngaih loh bakah, an duh hunah dah turin an ti zawk a ni.

Supplier tur thlanaah induh-sak-na uchuak a awm thei lo tih sawiin John Rotluangliana chuan, "Tender chhuah a nih chuan a chhang hniam ber thlan a ni ṭhin. Buhfai supply tur zawnaah hian a chhang hniam ber a inhnuhdawh avangin a chhang hniam ber dawttu SPAB-in an thlang. SPAB-ah hian member pawh ka ni loa, inrawlh theihna ka nei lo. A tawpah minister ka nihna angin ka approved mai a ni," a ti.

Supply Minister chuan MNF ṭhalaite'n buhfai supply tura tih grade 'A' supplier-in a supply lo tih an sawi chu chhangin, "A buhfai grade tehna kan nei hran lo. Mizo mipuiten buhfai ei tlak ngei an ei theihna turin grade 'A' hi kan ti mai a ni. Vawiin thlengin buhfai chhiat vanga complaint kan dawng lo," a ti a, buhfai supply zingah a chhia a awm chuan supplier an pekkir leh ṭhin thu a sawi.

John Rotluangliana chuan supplier tur thlanna atana tender an chhuah leh meka chhang thei tur vbc. 5 nei chin leh 6% deposit an tihna chhan sawiin, "Pawisa involvement a len avangin deposit tihsan a ngai. Supplier-in an tihṭhat duh loh chuan a tuar tur chu mipuite an ni. Mizo mipuite buhfai ei tur supply tur chuan hausa ve deuh an ngai, bill nghak reng tur an nih chuan harsatna kan tawk ang tih a hlauhawm," a ti.

Supplier tur thlanna chu lang-tlang takin an ti dawn tih sawiin Supply Minister chuan, "Duhsakna awm loin dik takin kan ti dawn. Zoram mipuite'n buhfai ṭha hnianghnar zawka an ei leh sorkar pawisa a tam thei ang ber hum hi kan tum ber a ni," a ti a, tender an koh tawh chu an kaltlangpui tur thu a sawi.

John Rotluangliana chuan MNF ṭhalaite'n buhfai chung-chang an ngaihven chu, "MNF ṭhalaite'n min venpui hi a lawmawm ka ti. A ṭha thei ang ber tih zel kan tum. Cheng khat mah sorkar sum hi ka eiru lo tih hi Zoram mipuite'n hria se ka duh," a ti a, MNF ṭhalaite chu buhfai kaihhnawiha thil dik lo awm theite venpui zel turin a sawm.

Minister ṭawiawmtu parliamentary secretary (Supply) TT Zothansanga chuan, tun dinhmunah Mizoramah buhfai thar chhuah lei tur an hmuh zawh loh thu a sawi.