AVBD Silver Jubilee Health Minister-in thisen pek uar turin a sáwm

Association for Voluntary Blood Donation (AVBD) chuan, nimin khan Synod Higher Secondary School-ah AVBD Silver Jubilee an lawm. Khuallian, Health minister Lal Thanzara chuan, a thlawna thisen pek uar zel turin Mizo ṭhalaite a sáwm.

Silver Jubilee lawmna hi AVBD president PC Lalhmingthanga'n a kaihruai a; Central KṬP general secretary Upa Zonunmawia'n hunserh a hmang. AVBD general secretary C Lalnunnema'n AVBD din dan leh hnathawhte a sawi a; joint secretary Lalrinkima kaihhruaiin AVBD office bearer hlui mi paruk hnenah chawimawina hlan a ni.

Health minister chuan, AVBD hming chu mawi a tih thu leh thisen petu an tam theih nana an hnathawhte chu fakawm a tih thu a sawi a; Mizoram chu a thlawna thisen pekah India rama state zinga a tiṭha 10 zingah a tel thu leh, hmarchhakah phei chuan a tiṭha ber pawl a nih thu sawiin, "Hetiang dinhmun kan thlen theih chhan hi AVBD hnathawh rah a ni," a ti.

Lal Thanzara chuan, "Voluntary blood donation-ah hma nasa takin kan sawn a, thisen mamawh pung zel mah se, a petu pawh an pung zel a ni," a ti a. Tun hma deuh chuan thisen pe tur inzawn chawp a ngai a, vantlang aurinna hmangin thisen petu tur inauh khawm ṭhin a ni a, tunah erawh chuan a thlawna thisen pek chanchin media-ah a lang ṭhin tawh zawk tih a sawi.

Voluntary blood donation-ah hmasawn zelna tur a awm thu sawiin, Thanzara chuan, "Thisen pek uar zel a ngai a, ṭan lak kan la ngai nasa hle. 100% voluntary donation kan nih hun a nghahhlelhawm hle," a ti. Hrilsel ṭha tan thisen pek a hlauhawm lo tih sawiin, "Thisen hi a thlakna a awm lo a, siam chhuah theih a la ni lo. Thisen pek hi khua leh tui
ṭha nihna a ni a, nun hlimna a ni," a ti a; thisen pek chu nunna chhanna a nih avangin, thisen pek uar zel turin Mizo ṭhalaite a sáwm.

Health Minister chuan, volun-tary blood donation lama sum tam zawk a awm theih nan Health depart-ment hotute'n ṭan an lak dawn thu a sawi a; Mizorama company-te'n corpo-rate social responsibility (CRS) kal-tlanga Rs. 3,00,000 tal an pek theih nan hma a lak tur thu a sawi bawk.

AVBD Silver Jubilee lawm nan hian blood donation camp huaihawt nghal niin, Synod HSS zirlaite'n thisen unit 47 an pe a, a petute mipa 31 leh hmeichhia 16 an ni.

Silver Jubilee lawmpui nan Aizawl Civil Hospital chuan Rs. 5,000 an pe bawk a ni.

Thisen peka Mizoram dinhmun

Kum    Pek zat.    Voluntary    Voluntary

                              Donation     Percentage

1993      3,119        56                  1.79%

1998      6,767.       684               10.10%

2001      7,454       1,675             22.47%

2004      13,521.    5,934             38.73%

2007      16,628     10,977           66.15%

2009-10   19,545    14,765          75.50%

2010-11   23,365    17,260          77.20%

2011-12 22,812      20,765.        91.08%

2012-13 22,358      21,032         94.07%

2013-14 22,226     20,699          93.13%

2014-15 23,093     17,663         76.49%

2015-16 24,940     18,910         75.82%