KHAWTHLIR

Sorkar motor-a Zirlai hruai khap

GAD chuan thuchhuah siamin, tunlai hian officer ṭhenkhat sorkar motor-a an fate sikul kal tur thlah leh hruai ṭhin tih tarlangin, "He thil hi sorkar chuan a ngai thutak hle a, hetiang tih ching officer-te chu sokar motor-a fate sikul kal thlah leh hruai hi ti tawh lo tura hriattir an ni," a ti a, thupek zawm lo hriat chhuah an awm chuan action lak a nih tur thu an sawi.

HSSLC result

MBSE chuan vawiin hian Higher Secondary School Leaving Certificate (HSSLC) Examination 2016 result a tichhuak dawn. Thu dawn danin, HSSLC result hi chawhma dar 11:45-ah MBSE pisa tualah târ chhuah a ni dawn a, MBSE website, www.mbse.edu.in ah en theih a ni bawk ang.

AIR golden jubilee

All India Radio, Aizawl Station chuan golden jubilee lawmna pualin nimin tlai khan AIR FM Station-ah AIR director DR Lalropuia’n jubilee meichher a chhí. AIR, Aizawl hi July 31, 1966-ah din a ni.

ADDPO hun hmang

Aizawl District Disabled People’s Organization (ADDPO) chuan nimin khan Zoram Entu Pawl conference hall-ah ‘Interface meeting with government officials’ tih hun an hmang.

Tla hlum

Nimin chhun khan Lalhlimpuia, Khawzawl Arro, Ramthar Veng, Ai-zawla khawsa mek chu Ṭhuampuia AMC building chung ber aṭangin a tla a, damdawi-in panpui a nih hnuah a hliam tuar loin a thi.

CMN lo zin

Myanmar rama Chin Media Network (CMN) member-te chuan Mizoram rawn tlawhin, nimin khan Aizawl an rawn thleng a, vawiin tlai hian Aizawl Press Club-ah MJA member-te nen an inkawm ang a, zanriah an kîlho nghal ang.

Ruang chhar

Nimin chawhma dar 11 vel khan Dawrpui Multipurpose Centre sakna turah mipa ruang chhar a ni a, a hnuah LB Hruaitluanga s/o MS Dawngliana, Sailam, tih hriat a ni.