Aizawl kawngpui zauh dan tur sawiho

Nimin khan UDPA minister Zodintluanga hoin, a pisaah UDPA department leh PWD hotute’n Aizawl khawpui kawng péngṭhuam inpawhna zingzum lai ṭhenkhat siam rem a, kawngpui zauh dan tur an sawiho.

Meeting-ah hian engineer-te’n kawngpui zauh dan tura hma an lo lak tawh dante an sawifiah a; hna kalpui dan tur ruahmanna an siamte chu an pawm a ni.

Kawng péngṭhuama kawngpui zauh tur zingah - Venghlui leh Republic kawng inpawhna (Pi Pángi junction) te, Ramhlun, Chaltlang leh NH-54 kawngpui inpawhna (Bawngkawn junction) leh, Chanmari West leh Vaivakawn kawng inpawhnate a tel a; Millennium Centre bul kawngpui zauh dan tur pawh ngaihtuah a ni. Kawngpuite zauh tura tihte a ruangam lo din tawh chu PWD, PHE leh P&E departmentte’n inráwn tlangin, estimate kimchang lo siam se, an ti.

Zobawka State Sports Academy sak mek pawh sawiho a ni a; Zodintluanga chuan, Academy sak nana second instalment sum hmuh sa hman zawh loha la awm hmangin September 2016 ral hma ngeia thawh tur hmabak awmte thawh a ngaih thu sawiin, chak taka thawh theihte chu thawk zo turin PWD hotute leh contractor-te a chah.

Meeting chuan, State Sports Academy, Zobawk sak nana sum awm sa hmangin hna pawimawh hmasa a theih chen chen thawh ni se, an ti a; third instalment a chhuah leh thuai theih nan ṭan lak ni se, an ti bawk.

Meeting-ah hian UDPA changtu parliamentary secretary Hmingdailova Khiangte, UDPA secretary C Vanlalramsanga, PWD engineer-in-chief R Vanlaltluanga leh chief engineer (building) Lalmuankima Henry leh, UDPA leh PWD officer dangte an tel a ni.