JJ Act-ah NE state zingah Mizoram pakhatna

May 8-9, 2016 chhung khan Assam Administrative Staff College, Khanapara, Guwahati-ah State Level Conclave on Juvenile Justice neih a ni a; naupang thil sual ti leh dan bawhchhiate chungchanga dante zirho a ni. Mizoram chu JJ Act tihhlawhtlin kawngah a ti ṭha bera puan a ni bawk.

Conclave hi Supreme Court judge Madan B Lokur-a'n a hmanpui a; Madan B Lokur chuan, naupang venhimna leh thil sual ti naupangte case uluk zawk leh chak zawka buaipui a nih theih nan judicial college-te'n nasa leh zuala hma an lak a ngaih thu a sawi.

Gauhati High Court chief justice Ajit Singh pawhin thu sawiin, Con-clave chu state tinte'n hmasawn phah nan hmang se a duh thu a sawi a ni.

Juvenile Justice (Care and Protection of Children) Act hlen-chhuahna turin Mizoram chu hmarchhak state zingah ruhrel (infrastructure) nei ṭha bera ngaih a ni a; Mizorama district pathumah observation home din tawh niin, district pangaah home din a ni tawh. Mizoram chu district tina Juvenile Justice Board (JJB) nei awmchun a ni bawk.

Conclave hi Gauhati High Court buatsaih a ni a, Assam State Commission for Protection of Child Rights leh Assam State Child Protection Society-te'n an puibâwm bawk a; Mizoram Judiciary aṭangin judge pali bakah, Mizoram State Child Protection Society aṭangin Aizawl leh Kolasib-a probation officer-te an tel.

Conclave-ah hian technical session-ah Mizoram, Assam, Nagaland leh Arunachal Pradesh-te'n an state ṭheuha thil sual ti naupangte case-a an hmalakna leh hmasawn dante an sawi a; research titu te, Gauhati High Court-a judge-te paper buatsaihte an zirho bawk.