KHAWTHLIR

Mizoram Synod hnuaia inkhawmpui lian ber dawttu Presbytery Inkhawmpui chu nimin khan hmun hrang hrangah ṭan a ni a, Pathianni thleng neih a ni ang. Covid-19 léng vangin Presbytery Inkhawmpuiah hian zan lamah inkhawm a awm lo a, chhun lamah rorel inkhawm neih a ni dawn a, vawiinah rorel ṭan a ni ang. Palai pawh a tlem thei ang ber an inruat a, Presbytery ṭhenkhatah chuan palai ni sate chauh an tel a ni.

State Referral Hospital (ZMC)-ah nimin khan Covid-19 vei dah luh an awm lo a, hripui vei tawh lo mi pathum chhuahtir an ni thung a; enkawl mek chu mi pariat chiah enkawl an ni ta. Covid-19 vei vanga enkawl mi pariat zinga pakhat chu ICU-ah a awm a, mi panga chu Isolation Ward-ah awmin, SICU-ah mi pahnih an awm a ni.

Federation of Mizoram Samagra (RMSA & SSA) Employees (FEMSE) chuan nimin khan Health minister Dr R Lalthangliana chu a pisaah an hmu a, Mizoramin Covid-19 a dona leh a ṭula hman turin ICU khum panga leh ZMC-a hman turin refrigerator lian pakhat an hlân. Thilpek hi FEMSE president R Lal­nun­hlima'n Health Minister hnenah a hlân a ni.

Mizoram State Rural Livelihood Mission (MzSRLM) buatsaihin Siaha RD Block hnuaia village organization 26 chuan nimin khan Financial Literacy Campaign cum Awareness and Enrollment on Bank and Health Insurance Programme an hmang. Bank-a thawkte chuan self help group (SHG) member-te bank account hawn dan, loan dil dan, insurance-a inziah luh dah leh SHG CIF loan lak dante an zirtir a ni.

Traffic SP chuan nimin khan hriattirna tichhuakin, October 10, Inrinni aṭang hian zing dar 9:30 leh tlai dar 4:30 inkarah VZ Building, Thakthing aṭanga Kulikawn Presbyterian biak-in inkar kawngpuiah pipe phûm a nih dawn avangin, kawngpui chu a chanve khâr a nih dawn thu a tarlang. Kawngpui hmangtute chu fimkhur leh hna thawktute ngaichâng chunga lirthei khalh tur leh kawngpui sirah lirthei leh bungrua dah lo turin a chah a ni.