Insuamnaa inhnamhnawih chuan An tuar mai tur a ni: Home Minister Zira

Home minister R Lalzirliana chuan, Aizawl dáia Zampuimanga thlân bula rangkachak phur motor suam thubuaiah tu pawh inhnamhnawih se an tuar mai tur a ni tih sawiin, "Police-te'n venthâwn nei loin an chhui a ni," a ti.

Home Minister hian nimin khan a pisaah thuthar thehdarhtute a kâwm a, December 14, 2015 zana rangkachak tawlhrûk phur motor suam thubuai police-te'n an chhui dan a sawifiah.

R Lalzirliana chuan, he thubuaiah hian hian social media lamah rin thu thehdarh a tam tih sawiin, "MLA anticipatory bail dil anga sawite leh police hotu inhnamhnawih anga sawite a awm," a ti a; rin thu sawi vak vak chu ṭha lo a tih thu a sawi.

He thubuaiah hian tu pawh inhnamhnawih se hum an ni dawn lo tih sawiin Zira chuan, "A inhnamhnawih an lian a nih pawhin an tuar mai tur a ni. Thil dik lo titute chu tu pawh ni se hlauh tur a awm lo. Vênthâwn nei loin police-te'n an chhui a, hei hian police-te kut phuar an ni lo tih a tichiang hle," a ti.

Home Minister press conference-a press statement-a a lan danin, April 21, 2016 khan Lalnunfela, Electric Veng, Aizawl-in Kulikawn Police Station-ah FIR a thehlut a; December 14, 2015 zanah Zampuimanga thlân bulah mi tu tih hriat loh mi paruk vel silai kengin an motor tidingin, an rangkachak tlang 52, mobile phone leh Rs. 75,000 an chhuhsak thu a ziak.

He thil thlengah hian DGP chuan Special Investigation Team (SIT) a din a; December 14, 2015 zana insuamna leh Bung Bangla bula December 13, 2015 zana insuamna a inzawma hriat a nih avangin SIT chuan a pahnihin an chhui zui ta a ni.

SIT hmuh danin, police-in an man tawh Lalmuanawma Mathipi, Zonuam chu Lalhmingthangi, Bawngkawn hnuaiah rangkachak tawlhrûk-naah an lo thawk dun tawh ṭhin a; eng emaw vanga inhmuhthiam lohna an neih avangin Lalmuanawma lungawi loin Lalhmingthangi sumdawnna chu tihchhiat a tum ta a ni.

Lalmuanawma hian a ṭhianpa Bulaki Chand Baid, Laipuitlang sáwmin, Lalhming-thangi tichhe turin an inthurual a; CS Thanga, Kanan Veng, Aizawl kaltlangin 39 Assam Rifles commandant Col. Jasjit Singh biain, ruahmanna an siamho ta a ni.

Col. Jasjit Singh thupekin December 13, 2015 zanah Nk.Sub. KC Roy hoin party pahniha inṭhenin, Tuikhurhlu chhakah leh Zampuimanga thlân bulah Assam Rifle-te an duty ṭan a, an duty-na hmun chu Lal-muanawma Mathipi te'n an vil reng a ni.

Duty-te chuan chhûn zân zawmin rangkachak phur motor an châng a; December 13 zan dar 11 velah Bung Bangla bulah an motor chân pakhat chu hmuin an dap a, rangkachak hmu lo mah se, an mobile phone leh wallet-te an chhuhsak.

Zampuimanga thlân lama duty-te chuan December 14 zan dar 10:45 velah an motor chân zinga pakhat Mahindra TUV, Lalnunfela, Electric Veng ta chu silai nen lo an tiding a, motor gear console aṭangin rangkachak tlang 52 nia sawi chu an la chhuak. Rangkachak zat hi Lalhmingthangi sawi dan a ni.

AR-te chuan an hlawhtlin thu an comman-dant Col. Jasjit Singh an hrilh nghal a, Jasjit Singh-a thupek angin rangkachakte chu bike hmanga phurin, Nk.Sub. KC Roy quarters-ah an dah a; a tuk December 15 zing dar 8-9 velah rangkachakte chu Col. Jasjit Singh-a bangla, Tuikhuahtlangah dah leh a ni.

Col. Jasjit Singh hian insuamnaa telte chu ko khawmin, an hlawhtlinnaah lawmthu hrilh pahin, engmah sawi chhuak lo turin thu a pe a, an ka hupna atan Rs. 70,000 aṭanga Rs. 1,00,000 ṭheuh a pe. Hetih lai hian, Col. Jasjit Singh chuan rangkachakte chuan a hnen a thlen loh thu a sawi thung.

Zawhna chhangin police hotute chuan, Col. Jasjit Singh chu inpuang lo mah se, a naute ho thusawi zawng zawngah ama tihtir vek a nih avangin finfiahna (evidence) ṭha tak a nih tur thu sawiin, "Evidence dang pawh kan la zawng zel a ni," an ti a; Lalmuanawma Mathipi pawhin insuamnaah a inhnamhnawih thu a sawi tawh niin an sawi.

Lalnunfela leh Lalhmingthangi te man an nih loh chhan zawhna chhangin police hotute chuan, "A hranpaa case siam ngaiah kan ngai lo. Police-te chuan insuamna hi kan dah pawimawh hmasa ber. Insuamna nen a inkaihhnawih tho a, a la lang chhuak mai dawn a ni," an ti a; anmahni chu finfiahna lak khawm nan an hmang ṭangkai niin an sawi.

Rangkachak tawlhrûk chu Customs ho buaipui tur a nih avangin, ziakin Customs an hrilh tawh thu police hotute chuan an sawi bawk.

Police hotute chuan, an thil chhuinaah Mizorama AR hotute mai bakah, an hmunpui thlengin an ṭawiawm ṭha nia sawiin, "Hetiang insuamna ang chi hi Mizorama thleng zen zen lo leh thil pawi tak a nih avangin sorkarin a ngai pawimawh hle," an ti a; thubuai chu chhui mek a nih avangin mipuite ṭawiawmna leh puihna an mamawh thu an sawi.

Press conference-ah hian Home Minister hi DGP Thianghlima Pachuau, IGP Zoram-mawia, DIG (NR) LT Hrangchal leh SIT-te'n an ṭawiawm a ni.