Sorkarin HPC(D) a be mai thei

Home minister R Lalzirliana chuan, HPC(D) demand area-a YMA group pahnih ngenna angin Central YMA-in HPC(D) leh Mizoram sorkarte chu inbe tura ngenna Chief Minister hnenah an thehlut tih sawiin, “Ngaihtuah tlak a niin kan hria,” a ti.

Nimina a pisaa thuthar thehdarhtute a kawmnaah zawhna chhangin Home Minister chuan, “Kan unaute an ni a, inhriatthiam lohna leh dinhmun sang zawk duh avangin silai an lek a ni. Lo inkâpin inthat tawh pawh ni ila, rambuai chu dawhkan kîla chinfel a ngai. A nih loh chuan inthah chimih vek a ni mai,” a ti a; inthah chimih ngawt chu sorkar duh dan a nih loh thu a sawi.

Zira chuan, autonomous district council inpe kher lo pawhin dinhmun sang zawka indah dan a awm tih a sawi a, “Sinlung Hills Development Council budget-te pawh tihpun theih a ni,” a ti.

HPC(D)-te hian inbiak an duh a nih chuan May 19, 2016-a Mizoram hmar lam khaw 31-a village council inthlan tur tibuai zawnga an awm a thiang lo tih sawiin, Home Minister chuan, “Inbiak an duh reng laia sorkar tibuai zawnga an awm a rem lo,” a ti a; HPC(D)-te chu inbiak an duhna tihpuitlin an duh chuan V/C inthlanah party ṭan bik nei loa an awm a ngaih thu a sawi.