Lottery kalpui a nih dan chhui zo Eirûkna lam hmuh chhuah ring lo

Mizoram sorkarin lottery a kalpui dan chu chhui zawh a ni tawh a, Institutional Finance & State Lottery (IFSL) hotute chuan lottery chhuitute'n eirukna an hmuh chhuah an rin loh thu Vanglaini an hrilh.

Ministry of Home Affairs (MHA) thupek angin, Mizorama lottery kalpui dan hi Comptroller and Auditor General (CAG) chuan kumin kum tir aṭang khan an chhui ṭan a, tun hnai khan an chhui zo. An chhuina report chu MHA-ah an thawn ang a, MHA-in endikin, a ṭul angin hma an la dawn nia thu dawn a ni.

CAG hian IFSL Directorate-a thawkte chu thil pawimawh hrang hrang an zawh bakah, an document duh angte an dil a; Mizorama lottery kalpuitu firm palite zir chiangin, an hmunpui West Bengal, Mumbai, Bangalore leh Delhi vela firm-te warehouse, ticket zawrh dan leh an head office-te an enfiah vek bawk.

Vanglaini palai zawhna chhangin IFSL hotute chuan, CAG hian eirûkna lam an hmuh chhuah an rin loh thu sawiin, "CAG hian MHA-ah report an thehlut ang a, a ṭul dan a zirin anni hian thu min la rawn zawtfiah mai thei. Engtin chiah nge an kalpui dawn kan hre chiang bik lo," an ti.

Thu dawn danin, Kerala leh Kolkata-a mite'n lottery kalpui danah dik lo a awm nia hriain, Calcutta High Court-ah public interest litigation (PIL) an thehlut a; chumi kal zelah chuan MHA chuan Kolkata-a lottery ticket hralh
ṭhin turin an state ṭheuh-
a CAG a hriattir a ni.

PIL-ah hian lottery ticket hralh danah thil dik tâwk lo a awm thu te, rules & regulation zawm a nih loh thute leh thil dangte tarlan a ni.

PIL chungchangah hian Mizoram sorkar chuan Calcutta High Court-ah insawifiahna a thawn tawh a; dik lo awm se chuan insawifiahna a thawnah hian complaint an dawn tur thu leh, complaint an la dawn ngai loh thute an tarlang.