KHAWTHLIR

AR Commandant Kawl leh dawn

Rangkachak tawlhrûk phurtu motor suam thubuaia man, 39 Assam Rifles commandant Col. Jasjit Singh chu nimin khan police-te'n chief judicial magistrate (CJM) hnenah kawl chhun-zawm an dil a; Court chuan darkar 48 chhung kawl chhunzawm a phalsak. Col. Jasjit Singh hi May 5 khan police-in an man a ni.

NLUP sem

Nimin khan Lungleia Vety Complex-ah Lunglei South Cluster chhunga chhungkaw 259 hnenah NLUP thawh thumna leh thawh linaa first instalment sem a ni a, Lunglei HPC vice chairman S Laldingliana'n a hmanpui. NLUP hnuaiah hian vawk-in sakna tur Rs. 28,000 ṭheuh sem a ni.

Hnathawkte zirtir

Agriculture Technology Management Agency (ATMA) buatsaihin, nimin khan Champhai IPR conference hall-ah 'Farmer Scientist Interaction' buatsaih a ni a; mithiamte'n ran natna chungchanga hriattir pawimawhte kut hnathawktute an zirtir.

Pass-te lawmpui

MZP leh NSUI chuan thu-chhuah siamin, MBSE-in HSSLC Examination 2016 result felfai taka a tichhuak thei chu lawmawm an tih thu leh, MBSE-a thawkte thawhrimna fakawm an tih thu an tarlang. MZP chuan, HSSLC pass tharte an lawmpui a, an kal zelna turah duhsakna an hlan .

Free clinic

Champhai Chief Medical Officer hnuaia mobile medical unit chuan, Thawhlehni khan Vapar khuaah a thlawna inentirna an buatsaih a, mi 70 chuang hriselna dinhmun endikin, a thlawnin damdawi an sem nghal.

Khapna sût

Sorkar laipuia Food Safety and Standards Authority of India-in energy drink, Tzinga siam chhuah leh hralh a khap chu tun hnai khan siam chhunzawm a phalsak leh tawh. Health department-a Commissioner of Food Safety chuan thuchhuah siamin, Mizorama Tzinga hralh a khap tawh pawh sûtin, zawrh leh hralh phal a nih thu a puang.