National Technology Day hman a ni

Nimin, May 11 kha National Technology Day a ni. He ni pual hian Directorate of Science and Technology chuan IPR Auditorium-ah hun an hmang a, Planning minister Lalsawta'n a hmanpui.

Lalsawta chuan science & technologies hman ṭangkai avanga khawl thil siam chhuah tam takte chu khawvela chengte nun tinuama ti awlsamtu leh ṭangkai tak an nih thu sawiin, "Tunlaiah mitinte hmelhriat mobile phone-te hi technology-in a khat tlat a, khawl thil te takte te dahkhawm chuan hna ropui leh tangkai tak thawk in hmun hla tak taka mi te bia in thlalak te kan inthawn thei te hi a mak a, heng khawl thil tel lo chuan kan nitin nunphung pawh a buai pha thei hial tawh," a ti.

Science & technology avanga khawvel hmasawnna hrang hrang mihringten kan hmuhchhuah chhoh chu a ropui rualin, Pa-thian thil siam erawh chu a technology a sang lutuk a, mihring te hian kan hre ve ṭan dawn chauh zawk tih sawiin Planning Minister chuan, "Siamtu awm lo chuan engmah a awm ngawt thei lo. Mihring te hi kan landan kan vun rawng leh kan hmel te hi a pawimawh ber lo, kan thluak hi a pawimawh zawk," a ti a, kan thluak ah hian enge kan dah a, enge kan thun belh tih ngaihtuah fo a pawimawh thu a sawi.

Inkhawm hi chief scientific officer Dr RK Lallianthanga'n a kaihruai a; Planning secretary Dr C Vanlalramsanga pawhin thu sawiin, inkhawma telte chu technology lama hmasawn zel tum turin a fuih.

National Technology Day pual hmannaah hian Mizorama technology lam zirna in hrang hrang - Mizoram University, National Institute of Technology (NIT) Mizoram, National Institute of Electronics and Information Technology (NIELIT) leh Women Polytechnic-a zirlaite leh zirtirtute an tel.

Sorkar laipui chuan May 11, 1998-a khawvel pum nghawrnghing khawpa nuclear ralthuam a enchhin hriatrengna atan leh technology lama India ram hmasawn zel a pawimawhzia hriatrengna atan May 11 hi National Technology Day atan a puang a ni.