Lawngtlai damdawi-ina nu leh a fa thihna Chhui turin sorkarin Lawngtlai DC a hriattir

Lallianmawia, Lawngtlai College Veng chuan May 1, 2016-a Lawngtlai District Hospital-a a nupui Lalhmunliani (21) leh a nau pâi an thih chungchangah May 10 khan Lawngtlai Police Station-ah FIR a thehlut. He thil thleng chhui tur hian Mizoram sorkar chuan Lawngtlai DC a hriattir.

Thu dawn danin, Lalhmunliani hi a nau pâi avangin April 30, 2016 zanah Lawngtlai District Hospital-ah an lut a; a tûk May 1-ah nau a hring a, mahse naute chu thi sain a piang. Lal-hmunliani pawh May 1 chhun dar 1 velah a thi ve leh a ni.

Lalhmunliani hian damdawi-inah enkawlna a dawng lo a, medical duty-te'n an ngaihsak ṭha duh lo niin a pasal, Lallianmawia chuan a sawi a; dam-dawi-in hotute lam erawh chuan an theih angin an buaipui niin an sawi ve thung.

Lalhmunliani nau chunga a thih danah hian Lawngtlai College Veng V/C leh NGO Joint Action Committee-te chu lungawi loin, May 10, 2016 tlai khan Lawngtlai Areopagy-ah an pungkhawm a, Lalhmunliani leh a nau hrin thi ta sûnna hun an hman bakah, resolution an pass a ni.

Lawngtlai College Veng V/C leh NGO JAC-te chuan, Lalhmunliani'n Lawng-tlai Civil Hospital-ah enkawlna a dawn tur ang a dawn loh thu te, damdawi-ina thawkte an inthlahdah thu te, damdawi-inah mi hausa leh mi rethei ang khata enkawl an duh thu te, Lalhmunliani leh a fa thihnaa mawhphurtute sorkarin chhui chiang se, an phû tâwk hremna pek an phut thu te, mitthi chhungte hnenah zangnadawmna pe tura sorkar an phût thute an tarlang.

Central YLA hruaitute pawh-in Lawngtlai CMO Dr HC Thang-kima hmuin, Lawngtlai Hos-pital-a thawkte inthlahdah chungchangah CYLA an ngawih mai mai dawn loh thu leh, CMO-in Health department thuneitu sang zawka report a pek chu thu belhchian dâwl lo a nih thu an hrilh nia thu dawn a ni.

Dr HC Thangkima chuan, Lalhmunliani leh a fa thihna chungchang chu chhui chiang turin sorkarin inquiry a din tawh thu CYLA hruaitute a lo hrilh.

Health minister Lal Than-zara'n Vanglaini palai zawhna chhanga a sawi danin, Lalhmun-liani leh a fa thihna chhui turin Lawngtlai DC ruat a ni a; Lawng-tlai DC chu chawlhkar khat chhung-in sorkarah report thehlut tura hriattir a ni.