Mipui tana thawk an ni tih inhre turin Zodintluanga'n MCS officer-te a chah

Mizoram Civil Service Association (MCSA) chuan nimin khan Aijal Club-ah Annual General Conference vawi 41-na an hmang a; khuallian, minister Zodintluanga chuan, sorkar hnathawkte chu mipui tana thawk tura awm an ni tih sawiin, an awm chhan hre chiang tur leh sorkarin a dahna apianga awm turin MCS officer-te a chah.

Zodintluanga chuan, MCS officer-te chu sorkar policy duangtu, sorkar hnuk pawimawh an ni tih sawiin, "Sorkar tan in pawimawh em em a, in thawh ṭhat leh ramin hma a sawn chak ang a, in thawh ṭhat loh chuan ramin hma a sawn lo ang," a ti.

Sorkar officer zingah mipui tana thawk tur an nih inhre loa lal emaw inti an tam tih sawiin, Zodintluanga chuan, "Mipui vanga thawk an an ni tih inhre loa mipuite intihlal khum tam tak an awm. Sorkar hnathawkte hi mipui vanga hlawh nei an ni a, engati nge mipuite hi kan lo intihlal khum ṭhin? Hlawh kan neih chhan kan hriat a ngai," a ti a; MCS officer-te chu mipui vanga awm an ni tih inhre thar turin a chah.

Minister chuan, sorkar hnathawk zingah post huphurh bik nei an awm fo tih sawiin, "Mahni duhna post zawnga vâk vâk officer a awm theih. Chutiang mi chuan an hna hlutna a tihniam a ni," a ti a; post mawm deuh thlang lo tura chahin, "Sorkarin min dahna apiangah lungawi takin i kal mai ang u," a ti.

Zodintluanga chuan, MCS officer-te chu hotute'n an inchuh ni thei khawp leh inchhuanpui thama thawh tum turin a fuih a; 'Ṭawngkam ṭhain sial a man' tih a taka nunpuitu ni turin a chah bawk.

MCSA conference hi an vice president K Laldingliana'n a kaihruai a, an president Lalzirmawia Chhangte pawhin thu a sawi. MCS officer thi pathumte sûnna hun hman a ni a, annual magazine an siam 'Rahbi' tih chu minister Zodintluanga'n a tlangzarh.

Chawhnu lamah agenda lutte an ngaihtuah. An thurel zingah, Mizoram sorkarin New Economic Development Policy kalpui a tumah nasa zawka sorkar thlawp te; sorkar ṭha, mipuite sorkar leh mipuite tana ṭangkai sorkar a nih theih nana sorkarin good governance a kalpuinaa thlawp tlat te; magistrate power pek an nih ṭhinah tun aia a kalphung awlsam zawk an duh thute a tel.

MCSA hian vawiinah Berawtlanga Tourist Complex-ah 'One day workshop for MCS officer' hun an hmang leh ang.