Vawk natna PRRS sawiho

AH&Vety department chuan Aizawl leh a chhehvela Vety field staff leh field officer-te chu nimin khan Vety Polyclinic conference hall-ah a ko khawm a; Mizorama vawk natna, Porcine Reproductive and Respiratory Syndrome (PRRS) lêng meka hmalak zel dan tur an sawiho.

AH&Vety director Dr Saingura Sailo chuan, PRRS natna chu tun hmaa Mizorama la awm ngai lo, natna chhuak thar a nih thu sawiin, "Kum 2013-ah Mizoramah a awm ṭan a, ranvulhtute tan hlohna nasa tak a thlen ṭhin," a ti a; mipui tithlabár zawnga thu thehdarh loh a ṭhat thu a sawi.

AH&Vety joint director Dr Hmarkunga sawi danin, kum 2013-a Mizorama PRRS a lên vanga Mizoram sum hloh zat chu cheng vbc. 40 chuang a ni a; tun thlengin PRRS laka venna tur damdawi a la awm lo.