Chin media-te leh MJA member-te inkâwm

Mizoram tlawha lo zin Chin Media Network (CMN) member-te leh Mizoram Journalists’ Association (MJA) member-te chu, Nilaini zan khan Aizawl Press Club-ah an inkâwm a, zanriah an kîlho nghal.

Inkawmhona hi MJA vice president Zonun-sanga'n a kaihruai a; MJA president Vanlalrema Vantawl chuan, tun hmain Myanmar leh Mizorama Zofate inkarah 'anni' leh 'keini' tih ang deuh a awm ṭhin thu sawiin, "Inunauna tichhe thei zawnga boruak awm ṭhinte theihnghilhin, inzawmkhawm a, thawhho zel a ṭul. Hmuh theih ramrîin min dang mah se, kan rilrua inzawmna hi he indáidanna bang hian a
ṭhiat tur a ni lo," a ti.

CMN member-te’n Mizoram an rawn tlawh theih danah Myanmar-ah zalenna a awm chho zel tih a langa a hriat thu sawiin, MJA President chuan, "Inthlakthleng awm tur hi a hlâwk zawnga hman thiam a ṭul a ni," a ti a; journalist-te chu sorkarin hmasawnna leh scheme a kalpuite zir chiang a, mipui hnena hrilhfiahtu tur an nih thu a sawi.

CMN chief coordinator CL Thanga chuan Mizoram an tlawh chhan sawiin, "Tuna kan programme hi study tour a ni ber a, unau ni si rei tak chhung inzir tawn loa kan awm hi rawn inzir a ngai niin kan hria a, chuta tana kan iptepui bànna chu MJA in ni. Study tour kan neih dawn hian Myanmar ram ṭhenawm hrang hrangte pawh kan rilrua a lan laiin, Mizoram tlawh hi kan inlungrualna ber a ni," a ti.

CMN director Salai Hung Tun Gei sawi danin, CMN hi kum 2012-a din a ni a, mipui leh sorkar inep ṭhin tihreh nan UNO bultuma ding an ni. Myanmar-ah, a bikin Chin hills-ah journalist-te leh media dinhmun a la ṭha lutuk lo.

MJA chuan CMN member mi 17-te hnenah anmahni lawmna leh hriatrengna atan thilpek hrang hrang an hlan a ni.