KHAWTHLIR

Vawk lak luh khap

Aizawl DC chuan Cr.PC Section 144 hmanga thupek chhuahin, tunlaiin Mizoram chhung hmun hrang hrangah vawk natna, PRRS a lên avangin Myanmar, Manipur leh Champhai district aṭangin vawk lak luh khap a nih thu a puang a; "Vawk vulh mekte'n an vawk vulh PRRS veite an hralh chhuak tur a ni lo a, an phûm ngei tur a ni," a ti.

Dan sawiho

Lawngtlai District Legal Service Authority bultumin, nimin khan LADC conference hall-ah Lawngtlai district chhunga dan kengkawhtu pathumte kalphung leh nihphung sawihona leh inrâwn khawmna buatsaih a ni a; LADC, CADC leh state hnuaia thawktute an tel.

Nurses Day pualin thisen pe

Nimin khan International Nurses Day a ni a, he ni pual hian Student Nursing Association, Health Worker Unit-te chuan nimin khan Aizawl Civil Hospital-ah thisen unit 33 an pe a, a petute mipa 28 leh hmeichhia panga an ni. International Nurses Day hi khawvela nurse hna thawktu ropui, Florence Nightingale pian ni, May 12-ah hman ṭhin a ni a, amah hi kum 1820-a piang a ni.

MSWCSSA conf.

Mizoram Soil & Water Conservation Subordinate Service Association (MSWCSSA) chuan, nimin khan SWC directorate conference hall-ah conference an hmang a, SWC minister Lalrinmawia Ralte-in a hmanpui. Inkhawmpuiah hian an member pension-a chhuak mi pakua thlahna hun leh an member thi mi pasarihte sûnna hun an hmang a ni.

Eng awm dawn lo

Naktuk, Inrinni hian Power Grid hnuaia Aizawl (PG) sub-station-a Luangmual Bay chu annual maintenance programme vangin zing dar 8 aṭanga tlai dar 4 thleng shutdown a ni dawn a; hei vang hian Aizawl tlak lam leh chhim lam veng, Chhimphei tlangdung, Lengpui leh Sairang leh a chhehvel leh Bawngkawn leh Chaltlang hmun
ṭhenkhatte'n power supply an hmu thei dawn lo.