Supply Minister a bân loh chuan MNF ṭhalaite'n Court-a kal an rilrûk

MNF ṭhalaite chuan, Food, Civil Supplies & Consumer Affairs (FCSCA) minister John Rotluangliana chu buhfai supply-naa thil dik lo ti-ah an puhin, bâng turin an phût nawn a; a bàn loh chuan Court-ah an thlen an rin thu an sawi.

MNYF hruaitute chuan nimin khan Aizawl Press Club-ah thuthar thehdarhtute an kâwm a; an president K Vanlalvena chuan, FCSCA department-in August, 2014-ah buhfai quintal 30,000 supply turin tender a chhuah tih sawiin, "An tender chhuahah hian quintal 30,000 hi thla tin emaw, kum khat atan emaw ziah lan a awm lo. Supply Minister-in May 15, 2014-a tender chhuah a sawi kha thil hrang daih a ni," a ti.

K Vanlalvena sawi danin, tender kaltlanga Lalrindika Ralte-in buhfai qtl. 30,000 a supply hnuah thla tin buhfai mamawh chu qtl. 80,000 a nih avangin tender chhángtute zinga a chháng hniam pangate chu Lalrindika supply-na rate-a supply tir ve turin FCSCA Sceretary-in November 17, 2014 rawtna a thlen a; mahse, chu rawtna chu State Project Approval Board (SPAB)-in a hnâwl.

Lalrindika Ralte-in Novem-ber 2015-ah buhfai qtl. 60,000 supply tura order a hmuh laiin, February 15, 2016 thlengin qtl. 27,341.12 chauh a supply thei a, chuvang chuan FCSCA department hotute pawh an mangang hle. An mamawh ang thla li chhung supply a nih loh avangin FCSCA department chuan tender chhuaha a chháng hniam pangate chu Lalrindika supply-na rate anga supply ve turin February 16, 2016-ah rawtna an thlen a ni.

FCSCA department rawtna chu Mizoram sorkarin a pawm lo a, an pawm loh thu chu March 3, 2016-ah Director hnenah hriattir a ni. Rawtna pawm loh chhan chu, sorkar file-a a lan danin, Supply Minister chu thu taka a inrawlh vang a ni.

K Vanlalvena chuan, Lal-rindika Ralte-n thla li chhung buhfai a supply theih loh vanga an mangan em em laiin Lalrindika Ralte chu March leh April 2016-ah buhfai qtl. 1,60,000 ve ve supply tura tih a ni leh tih a sawi a, "Hetianga Lalrindika Ralte order pek leh a ni hi Supply Minister-in a duhsak uchuak vang liau liauah kan ngai," a ti.

MNF ṭhalaite chuan, Lal-rindika Ralte chu November 2104 - May 2016 thleng tender chhuah loa buhfai supply tir a nih thu sawiin, "Buifai qtl. 30,000 supply tura tender chhuah a nih laia qtl. 10,22,597 supply tir a ni hi dan bawhchhiatna leh corruption lian tak a ni," an ti a; Supply Minister chu a báng lo a nih chuan Court an thlen an rin thu an sawi.

Lalrindika Ralte hminga buhfai supply-tu hnam dangte'n qtl. khat Rs. 2,300-in Zuangtuia Supply kudama an dah ṭhin thu an hrilh niin an sawi a, "Lalrindika Ralte hian qtl. khat zelah Rs. 275 hlêpin a supply ṭhin tihnaah a ngaih theih. Tender hmu loa bufai supply tirna aṭanga hlêp chu thla 18 chhungin cheng vbc. 28.12 a ni. Hlêp hi Lalrindika ni lo, mi thiltithei zawk hlâwkna téltu an awm ngei ang," an ti.