Shillong YMA-in fimkhur turin an chah

Shillong Group YMA chuan thu-chhuah siamin, Aizawl leh Shillong/Guwahati inkara maxicab chetsualna thleng fo leh miin nunna an chân phah ṭhin chu motor khalhtu inthlahdah vang leh bungraw phurh hnem lutuk vanga chetsualna thleng a nih tlangpui thu an tarlang a; maxicab neitute leh khalhtute fimkhur zawka khalh turin an chah.

Shillong YMA chuan, Aizawl-Shillong-Guwahati zin kawngah Mizo maxicab an chesual fo tawh a, nunna chán pawh eng emaw zat an awm tawh tih sawiin, "Inthlahdah leh duhâm vanga hetiang ang chhiatna a thleng leh a nih chuan Shillong Group YMA chuan a mawhphurhtu hrem a nih theih nan a tawp thlengin a ûm zui ang," an ti.

Maxicab neitute'n sum an ûm luat vangin zin kawng thui tak tlân turah driver inchhâwk thei tura pahnih ruai loin, pakhat chauh khalhtir mi tam tak an awm thu sawiin, "Hlawh tlem zawka rawih theih an nih vanga mimalin an rawih duh loh tawp tur driver zu in hmang leh hawihhâwm lo tak tak an ruai a. Motor ṭâwng tawh takte pawh a him leh him loh ngaihtuah loa tlântir an awm bawk," an ti a; maxicab ṭhenkhat phei chu khawpui chhunga tlânpui atana zahpuiawm khawpa ṭâwng leh passenger-te tana chuan hrehawm a nih thu an sawi.

Shillong Group YMA tarlan danin, maxicab counter neitute leh sumdawng
ṭhenkhatin maxicab-te chu bungraw phurhna tur emaw tiin motor-in a tlin bak bungraw phurh nan an hmang ṭhin a; chuvang chuan hian chetsualna a thleng fo a ni.

Mimal inthlahdah leh duhâm vanga pawisawi lote'n nunna an chán fo chu hriatthiam harsa an tih thu sawiin, Shillong YMA chuan, "Accident a thlen tawh loh nan maxicab neitu, khalhtu leh ticket pe chhuaktute fimkhur lehzual turin kan hriattir a. Mipui rawngbawl an ni tih hria a, passenger-te chungah hawihhâwm chhuah leh him taka an tum hmun thlen chu an tih tur a ni tih hre mawlh rawh se," an ti.