International Nurses Day hmang

Nimin kha Inter-national Nurses Day a ni a, he ni pual hian Mizoram hmun ṭhenkhatah nurse-te'n hun an hmang. Nurses Day hi khawvela nurse hna thawktu ropui, Florence Nightingale pian ni, May 12-ah hman ṭhin a ni a, amah hi kum 1820-a piang a ni.

Nurses Day pual hian Student Nursing Asso-ciation, Health Worker Unit-te chuan nimin khan Aizawl Civil Hospital-ah thisen unit 33 an pe a, a petute mipa 28 leh hmeichhia panga an ni.

International Nurses Day pual hian Aizawl Civil Hospital (ACH)-a nurse-te chuan nimin khan Chawnpuia Ṭawngṭai Bethel Camping Centre-ah a thlawna blood pressure blood sugar enfiahna hun an buatsaih a, mi 220-te an endik. Centre hnenah hian buhfai ip hnih leh alu ip khat an pe bawk.

Nurses Day pual hian ACH conference hall-ah inkhawm buat-saih a ni a, ACH nur-sing superintendent Lal-remmawii'n kaihruaiin, HFW joint director (Nursing) Lalbiaksangi khuallian a ni. Kumina International Nurses Day thupui chu, "A force for change, improving health system resilience' tih a ni a; inkhawmah hian Mizorama B.Sc. (Nursing) hmasa ber Thanpari Pautu hnenah Lifetime Achievement Award an hlan.

International Nurses Day lawm nan hian ACH-a nurse-te chuan Nilaini khan Aizawl DC office complex leh Assembly Secretariat-ah a thlawnin BP test leh blood sugar test an tihsak bawk a; mi 200 vel an endik a ni.