Thàl kang theih loh tuikhur kan nei - Hawla

Chief minister Lal Thanhawla chuan a kaihhruai sorkarin sum leh páiah thàl kang theih loh tuikhur an nei nia sawiin, "Zoram mipui tan lungngaihna tur a awm lo," a ti.

Lal Thanhawla hian nimin khan Congress Bhavan-a in-khawm-ah thu sawiin, Finance Minister kaihhruaina hnuaiah sum dinhmun chinfel zel a nih thu a sawi a, "Nasa takin hma kan la a, hma kan sawn zel a ni. MNF sorkar chuan tuikhur, tu'ma thâl ve theih loh an nei ṭhin a, kan sorkar chuan tuikhur thàl kang theih loh kan nei a ni," a ti a; a kaihhruai sorkar chu sum enkawl thiam loa puhtu awm mah se, hmasawnna hnathawh hmuh tur a tam niin a sawi.

Sorkar hmalakna hrang hrang sawiin Chief Minister chuan, "Miretheite tan hmun hrang hrangah in sak a ni a, kawngte pawh kan siam zel a, power lamah pawh hma kan sawn zel. Fûr apianga power supply chhe ṭhin pawh cheng vbc. 67 séngin kan siamṭha mek a ni," a ti.

CM Hawla chuan, an policy thar New Economic Development Policy (NEDP) chu zir tham a ni tih sawiin, "Mithiamte pawhin
ṭha an ti hle. He policy hian kan tu leh fate thlenga an chhawr theih tur eizawnna ngêlnghet din a tum dawn a ni," a ti a; NLUP vangin Mizoram dinhmun ṭha thawkhat mah se, tu leh fate thlenga chhawm tlak eizawnna ngêlnghet siam chu a kaihhruai sorkar duh dan a nih thu a sawi.

NLUP chu hlawhtling thaw-khat mah se, an beisei anga ti lo eng emaw zat an awm tih sawiin Lal Thanhawla chuan, "Chu'ngte hlei hlei chu dâwmkân ngai an ni si a, eizawnna ngêlnghet tak an din theih dan tur kan ngaihtuah sak dawn a ni," a ti.

Chief Minister chuan, NLUP vanga tuna hlawhtling ṭhenkhat, nakin zela eizawnna ngêlnghet tur din si lo an awm tih sawiin, "NLUP hmanga kum hnih khat atana intodelh, nakin zel atana daih lo turte an awm. Ram leh hnam innghahna tlak eizawnna ngêlnghet siam kan duh," a ti a; NEDP hmanga chhuan lo la awm tur zel thlengte pawhin an chhawr tlak, ei leh bara intodelhna tur siam an tum thu a sawi.

Malsawmna dawng turin tawrh a ngai tih sawiin Lal Thanhawla chuan, "Mi îtsîkna neihte hi thil
ṭha a ni lo a, kan tan hun ruat nghah a ngai. Malsawmna dawng tur chuan chhel taka kal ṭauh ṭauh a ngai a ni," a ti.

NEDP hi kumin sorkar kum aṭanga kalpui ṭan tur a ni a, kum nga chhung kalpui tura ruahman a ni. Kum 2016-17 chhungin NEDP kalpuina atan budget-ah cheng vbc. 250 dah a ni a, NLUP leh sorkar department dangte'n hna pawimawh an thawh mekte hlâwk zawka kalpui a nih theihna atan ruahman a ni.