District 3-ah vawk 2,620 vel an thi tawh

Champhai aṭanga thu dawn danin, tun hnaia vawk natna, Porcine Reproductive & Respiratory Syndrome (PRRS) lêng avangin Champhai, Lunglei leh Lawngtlai district-ahte vawk 2,620 vel an thi tawh a, vawk damlo eng emaw zat a la awm.

AH&Vety director Dr Sai-ngura Sailo chuan, joint director Dr Jasper Rongura Sailo kaihhruai Vety team-in tun hnaia Thenzawl, Lunglei leh Lawngtlaia vawk thi leh damlo thisen leh tisa them an lakte chu Selesiha College of Veterinary Science laboratory-ah enfiah a ni a, PRRS vanga thi an ni tih finfiah a nih thu a sawi a; Thenzawla mite erawh chu PRRS ni loin, vawk hri dang vanga thi a nih thu a sawi.

Dr Saingura sawi danin, PRRS vang hian tun hnaiah Champhai district-ah vawk 2,350 chuang an thi tawh a; tun kar chhoah PRRS hri léng chuan ziaawm lam a pan nia hriat niin, ni khata vawk thi zat pawh a tlahniam tawh a ni. Myanmar
aṭanga vawk lak luhna kawngpui ber, Zokhawtharah erawh chuan an vawk vulh zingah PRRS vei hmuh a awm lo thung.

Hetih lai hian, PRRS vanga vawkin natna dang an kai (secondary infection) venna tur damdawi Zentimycin chu Champhaiah thawn a ni tawh a; damdawi chu vawk vulhtute hnenah sem a ni a, a awm ang ang sem zawh thawkhat a ni. Zentimycin hi PRRS vei vawkte'n an ṭhatpui dawn leh dawn loh hriat chian a la nih loh thu AH&Vety department mithiamte chuan an sawi.

Lunglei leh a chhehvela vawk thi zat chu 100 vel a ni a, Lawngtlai leh a chhehvelah pawh vawk 70 vel an thi tawh bawk.