KHAWTHLIR
Kawng dan tum
Ṭawipui 'S' khawtlang chuan, NH-54 Lunglei-Tuipang kawngpui siam mekah an khua kal kân a nih vang leh an khaw chhunga kawngpui siam tura an phûtna tihpuitlin a nih loh avangin tukin zing aṭangin tiam chin awm loin an khua paltlang tur lirthei zawng zawng dan an tum. Kawngpui dan turah hian buaina a chhuah loh nan sorkar chuan police eng emaw zat duty tir a tum nia thu dawn a ni.
MLA-te thukhawm
Mizoram Legislative Assembly-a committee pêng pakhat, Committee on Government Assurances member-te chu nimin khan Assembly Annexe committee room-ah an ṭhukhawm. He Committee-ah hian chairman chu R Vanlalvena a ni a; member-te chu - Dr Ngurdingliana, Lalthanliana, Chalrosanga Ralte leh Vanlalawmpuii Chawngthu-te an ni.
NEDP sawiho
Ningani tlai khan chief minister Lal Thanhawla hoin, CMO conference hall-ah New Economic Development Policy (NEDP) hlawhtling taka kalpui dan tur sawiho a ni. NEDP-in hmasawnna kawnga hna pêng hrang hrang a thawh turah sorkar department tinte'n ṭhahnemngai tak leh theihtawp chhuaha an kalpui theihna atan ngun taka vil ni se, an ti.
NCD clinic
National Programme for Prevention and Control of Cancer, Diabetes, Cardiovascular Diseases and Stroke (NPCDCS) leh National Programme for Prevention and Control of Deafness (NPPCD) chuan, nimin khan Salem Veng, Aizawlah awareness campaign leh NCD screening clinic an buatsaih. Mi 270 vel an inentir a, test chi hrang hrang an tihsak a ni.
Tuiah tla hlum
Nimin chhun dar 12 vel khan Lalrawngbawla s/o Lianthanga (L), Chhinga Veng, Aizawl chu Khawchhhak Tuipuiah a tla hlum a, he thu ziah lai thleng hian a ruang hmuh a la ni lo. Thu dawn danin, Lalrawngbawla hi Zawlsei Branch KṬP-in Tuipuia sum tuak hnatlang an neihah a tel ve a, luia lên a denna lamah a chesual a ni.
MCS workshop
DPAR leh Mizoram Civil Service Association chuan nimin khan MCS officer-te tan, 'Towards inclusive growth and development' tih thupui hmangin workshop an buatsaih a, minister Lalrinmawia Ralte-in a hmanpui.Workshop-ah hian UDPA secretary Dr C Vanlalramsanga leh UDPA joint director Vanlalmawia ten thupui hmanga paper an buatsaih zirho a ni.