MADC-a thawkte an nuar

Mara Autonomous District Council (MADC)-a thawk mi 1,800 vel chu 6th. Pay arrear la pek loh pe thuai tura MADC sorkar nawr nan Federation of MADC Employees Joint Action Committee huaihawtin May 12, 2016 aṭang khan tiam chin awm loin an nuar a; MADC pisa tualah pung khawmin, pisa an kái lo.

MADC-a thawkte hian 6th. Pay arrear an la lak kim loh 48% zinga a zatve tal chu NITI Aayog sum cheng nuai 764 an hmuh aṭanga pe turin MADC sorkar an phût a, mahse an hlawhchham a ni.

MADC sorkar hotute chuan, NITI Aayog sum chu hmasawnna hna thawh nan chiah hman tur a ni a, thil dangah hman a rem lo niin an sawi. Thawktute rilru thawi dam nan MADC-in Mizoram sorkar
aṭanga kumin sorkar kum atana an sum hmuh tur first instalment aṭanga nuai 141 pek an tiam chu thawktute chuan an duh bik lo a ni.

MADC-a thawkte chuan, 6th. Pay arrear an la dawn loh 48% zatve, Rs. 2,82,50,000 tal pek an nih loh chuan an nuar chhunzawm zel dawn niin an sawi a; MADC thawkte'n March leh April thla hlawh an la la lo niin an dawi bawk.