Ruihhlo Do Core Committee kalpui an duh thu CYMA-in CM an hrilh

Central YMA hruaitute chuan nimin khan chief minister Lalduhoma a pisaah an hmu a, ruihhlo donaa hma latu Ruihhlo Do Core Committee kalpui thar leh ṭha an tih thu an thlen.

CYMA hruaitute chuan ruih­hlo do chungchangah sorkar, tlawm­ngai pawlte leh kohhrante an ṭanho a ṭul thu sawiin, hun hmasa lama sorkarin Chief Minister kaihhruaina hnuaia a din, State Level Core Committee on Ruihhlo Do chu din thar leh ṭha an tih thu an thlen a; CM Lalduhoma chuan, State Level Core Committee a rang lama koh ṭha a tih thu leh hma a lak tur thu a lo hrilh a ni.

Mizorama ram dang mi, Myanmar lam aṭanga ráltlâna rawn lutte chungchangah CYMA hruaitute chuan, India khua leh tui dik takte chauhin an neih theih document hrang hrang - Aadhaar card, voter ID, birth certificate leh a dangte India khua leh tui ni lote zingah neih tuma hma la an awm fo thu leh, nei an awm ṭhin thu CM an hrilh a; fimkhur a ṭul thu leh common service centre-te pawh an fimkhur a ṭul thu an sawi.

Raltlante chungchangah hian Chief Minister chuan, Prime Minister leh Union Home Minister rawtna anga Myanmar aṭanga ráltlânte hman tur Biometric Enrolment Portal siam thar chu hman thuai a nih tur thu a lo hrilh.

CYMA hruaitute chuan Inner Line Permit (ILP) pek chhuah dan CM an sawipui bawk a; Chief Minister chuan, sorkarin ILP dan a enṭhat mek thu leh a pek chhuah danah changtlung zawk (online tracking system) kalpui tum a nih thu a sawi a, a ṭul anga rawtna siam turin CYMA a chah.

Lalduhoma chuan, chhungkaw tinte chhinchhiahna tur Mizoram Assembly House-a pawm tawh, Household Registration chungchangah buaipui ngaite buaipui mek a nih thu sawiin, lo ngaihven zui zel turin CYMA hruaitute a chah bawk.

Chief Minister nena inkawm­naah hian CYMA president Lalhma­chhuana leh office bearer dangte an tel a ni.