Tuialhthei a ziaawm hnaih kan beisei - Supply Minister

Food, Civil Supplies & Consumer Affairs (FCSCA) minister B Lalchhanzova chuan, tuialhtheia Mizoramin harsatna a tawh chu a ziaawm hnaih tawh an beisei thu a sawi.

Vanglaini palai zawhna chhangin B Lalchhanzova chuan, "Lumding leh Badarpur inkar rél kawng chhia vanga tuialhtheia harsatna kan tawh hi rél kawng siamṭhat leh a nih tawh avangin a ziaawm hnaih tawh kan beisei. Mizoram ta tur pawh rélin a rawn phur ṭan tawh a, thuneitu lam pawh kan be pawp reng," a ti.

FCSCA Minister chuan, tuialhthei a rawn luh reng thu sawiin, "Mipui tan chîâina tur a awm lo. Kan hman khawp ṭheuh zel la ila, harsatna em em tâwk loin kan awm thei vekin a rinawm," a ti a; tuialhthei chheprelh lo a, mamawh khawp chauh la ṭhin turin mipui a chah.

Hetih lai hian, nimin lamah chuan Aizawla petrol pump eng emaw zat chuan mipui náwlpui hnenah tuialhthei an pe chhuak thei lo a, permit leh coupon nei chauh an pe. Pump ṭhenkhatah erawh a duh apiang tan lâk theih a ni bawk.

FCSCA department chuan petrol pump neitute chu May 14, Thawhlehni khan dead stock bakah petrol-ah litre 1,000 leh diesel-ah litre 3,000 an neih chinah department phalna lo chuan hralh chhuak tawh lo turin a hriattir a ni.