Kawlphetha tihtawp a la ngai ṭhin dawn Minister-in mipui hriatthiamna a ngen

Power & Electricity minister F Rodingliana chuan, kawlphetha hnianghnâr zawka mipui pek a nih theih nan PE department-in theihtawp a chhuah zel tur thu sawi rualin, kawlphetha lama hmasawnna hna thawh avangin power shutdown tih zauh zauh a la ngai rih dawn niin a sawi a, mipui hriatthiamna a ngen.

Minister F Rodingliana hoin PE department officer-te'n May 14, Thawh­lehni khan tun hnaia Mizoram hmun hrang hranga power supply khaihlak ṭhin chung­chang leh mumal leh ṭha zawka kawlphetha pek dan tur an sawiho a ni.

F Rodingliana chuan, tun hnaia thli leh ruah vanga kawlphethaah mipuiin harsatna an tâwk chu pawi a tih thu sawiin, kawlphetha hnianghnâr zawka mipui pek a nih theih nan PE department-in theihtawp an chhuah zel tur thu a sawi.

Minister chuan, Aizawl khawpui bikah ṭha zawka mipui hnena kawlphetha pekna tura hnathawh mek, RDSS leh Smart City Project chu hmun thuma ṭhen hmun khat thawh zawh a nih tawh thu a sawi a; hmasawnna hnathawh avangin power shutdown tih zauh zauh a la ngai rih dawn tih sawiin, hrethiam turin mipui a ngen.

Ṭhutkhawmah hian, Mizoram hmun hrang hranga kawlphetha chung­­changa harsatna awmte PE department hnena hriattir zung zung­na tur Customer Care Centre (CCC) chu tuai thar leh a, eng lai pawha biakpawh theih tura siam leh superintending engineer tlukpui officer pakhatin a bik taka a vil turin an rêl. CCC kaltlangin power supply chungchang harsatnate thlen theih a ni dawn tih an tarlang.

Transformer chhia vanga kawlphetha pek chhuahnaa harsatna awm mekte chinfel nan state budget-a transformer leina tur pawisa dah hmangin transformer thar company aṭanga man tláwm zawka lei dan tur ruahmanna thlirho a ni.

Hydel project hrang hrangte tuai thar dan tur thlirho a nih bakah, kawlphetha tam zawk siam chhuak thei turin ruahmanna hrang hrang siam a ni a; Mizoram hmun hrang hranga kawlphetha pek chhuahna ruhrel siam mekte thlirho a ni bawk.

Ṭhutkhawm hi PE Minister a dam ṭhat loh avangin a inah neih a ni a, PE department-a superintending engineer chin chung lam an tel. Minister chuan, ZPM party policy anga kawlphethaa intodelh tura hmalaknaah PE department officer-te chu ram hmangaihna leh siamṭhat duhna thinlung pu chunga thawk turin a chah a ni.