Car loan vbc. 150 vel tihchingpen thubuaiah mi pakhat man belh a ni
Mizoram Police hnuaia din Special Investigation Team (SIT) chuan Mahindra & Mahindra Financial Service Ltd. (MMFSL) kaltlanga car loan cheng vbc. 150 vel tihchingpen thubuaiah tun hnai khan mi pakhat an man belh.
CID (Crime) SP kaihhruai SIT chuan thubuai hi ngawrh takin an chhui mek a; thubuai an chhui ṭan tirh lama mi 11 an man tawh bakah tun hnai khan MMFSL, Aizawla thawk hnam dang pakhat chu Aizawlah man belhin, May 14 Thawhlehni khan court-ah an hruai a ni.
Police hotute aṭanga thu dawn danin, mi dang man belh tur eng emaw zat an la awm rin a ni a, ngawrh taka chhui zel a ni. Aizawla car rental-te pawh an inhnamhnawih dan leh hlâwkna an tèl ve dante chîk taka chhui zel a ni a, chhui ngai a tam avangin a hmáwr an la báwk dawn hnai lo.
April 17, 2024 khan DGP Anil Shukla chuan thuthar thehdarhtute kâwmin, MMFSL kaltlanga car loan cheng vbc. 150 vel tihchingpen chungchanga an hmalak dan a sawifiah a, "MMFSL hotute'n Aizawl Police Station-ah March 20, 2024-ah FIR an thehlut a, mahse, sum kaihhnawih a tam avangin Mizoram Police hnuaia Economics Offensive Wing-ah thubuai ziah luh a ni," a ti.
SIT an din thu sawiin Anil Shukla chuan, "Ngawrh takin an chhui. Bul tumtu ber chu MMFSL, Mizorama area business manager Jakir Hussain (41), Tejpur, Assam tih an hre chhuak," a ti a; thubuai kaihhnawihah Jakir Hussain bakah a thurualpui mi 10 man an nih tawh thu a sawi.
DGP sawi danin, car loan hi document lem 2,000 vel hmangin an la hman a, sum an tihchingpen chu cheng vbc. 150 vel a ni. Aizawla car dealer - CK Motor Hyundai, NBE Tata, Rafael Nissan, Aidu Motors Renault, Standard Motors - Two Wheeler-te pawh an inhnamhnawih a ni.