High School-ah 'Intodelh' subject kalpui tum

Mizoram sorkar chuan kumin academic session kal mek aṭangin pawl 9 leh 10 zirlaite tan enchhinna (pilot project) angin Aizawla sikul ṭhenkhatah 'Intodelh' subject kalpui a tum a, sorkar laipui pawmpuina nghah mek a ni.

School Education minister Dr Vanlalthlana chuan, kumin academic session aṭangin H/S zirlaite tan ruahmanna thar an neih thu a sawi a, "Tunah hian a inchiah mek. Aizawla sikul eng emaw zatah pawl 9 leh 10 zirlaite tan pilot project angin Intodelh subject kan kalpui chhin dawn. Kan tum ber chu zirna hian hna zawng tur ni lo, mahni kea ding thei tura zirlaite buatsaih a ni a; an zir zelnaah an hlawhtling ta lo a nih pawha anmahni kea ding thei tura zirlaite chher kan tum," a ti.

Intodelh subject hi Samagra Shiksha hnuaia kalpui turin sorkar laipui­ah an dil thu sawiin Dr Vanlalthlana chuan, "Official-in pawmpuina lehkha kan la dawng lo a, mahse, pawm tur list an siamah chuan a tel," a ti a; pawmpuina an dawn ve leh a taka kalpui nghal an tum thu a sawi.