KHAWTHLIR

Faina hnatlang

Border Security Force (BSF) 20 Battalion, Lungleia mite chuan May 14-15 khan 'Meri Life Amplification Plan 2024' hnuaiah faina hnatlang an huaihawt a, Lunglei Zotlang leh Pûkpui inkar kawngpui leh a chhehvelte an thian fai. Hnatlangah hian BSF mite leh tualchhung mi eng emaw zat an tel a ni.

Tuiah tla hlum

Lalṭanpuia (18) s/o Lalfakzuala (L), Saikhamakawn chu May 14, Thawhlehni khan Tuirial lui, Khumtung kàiah chesualin a tla hlum. Lalṭanpuia ruang hi a tlakna aṭanga hla vak loah darkar khat hnu velah hmuh a ni a, nimin khan vui a ni.

PM-POSHAN zirho

Nimin khan Saitual Gospel Centenary Hall-ah 'Workshop on Management of Pradhan Mantri Poshan Shakti Nirman' (PM-POSHAN) buatsaih a ni a, School Education director Lalsangliana, PM-POSHAN nodal officer ni bawkin a hmanpui. Zirhonaah hian Saitual block-a primary school 40 leh middle school 36 bakah, Ngopa block-a primary school 17 leh middle school 16 aiawhte an tel a ni.

AAP leh PC thawhho tum

Peoples' Conference party leh Aam Aadmi Party (AAP) hruaitute chu nimin khan PC party pisaah an ṭhukhawm a; sorkar khalh ngil tur leh ram leh mipui hamṭhatna atan thawhho zel an remti.Ṭhutkhawmah hian Office of Profit leh dan kalha che nia an hriat MLA-te chungchang te, sorkar hmalakna hrang hrang leh kal dante an sawiho a, "Sorkar khalh ngil tur leh ram leh mipuite hamṭhatna atan party pahnihte hian thawhhona ṭha neih zel ni se kan ti," tiin an thuchhuahah an tarlang.

Zu man zat

Kumin April thla chhung khan Excise & Narcotics department leh Mizoram Police chuan rakzu litre 8283.075, zu rui mi 67, zu zuar mi 533 leh zu bilhlai ṭin 6,638 (litre 960) an man. END leh police-te hian sap zu (ml 750) ûm 791, ml 375 ûm 403 leh ml 180 ûm 560 an man bawk.